Өмүрбек Бабанов Ошко иш сапары менен барып келип, жакынкы 10 күндүн ичинде Бишкек жана Ош аэропортторунда иштеген ИИМ, Чек ара жана Бажы кызматынын бардык кызматкерлерин алмаштырууну буюрду. Буга элдин “аэропорттогу орган кызматкерлери коррупцияга белчесинен батып кетти” деген арыздары себеп болгонун айтат өкмөт башчы. Эми бул буйруктун негизинде азыркы учурда аэропортто иштеп жаткан бардык орган кызматкерлери 10 күндүн аралыгында башка жерлерге которулуп, ордуна жаңы кызматкерлер келет. Ошол эле учурда жаңы кызматкерлер 1 ай аралыгында паракорчулукка каршы күрөшүп, натыйжа алып келе албаса, иштен айдалышарын Бабанов баса белгиледи.
Эскерте кетсек, өкмөт башчы Өмүрбек Бабанов биздин редакцияга келип, түз байланышта окурмандарыбыздын суроолоруна жооп берген эле. Анда Ош шаарынан чалган Айзада аттуу окурманыбыз аталган шаардагы аэропортто иштеген чек ара кызматкерлери 90 күн каттоосуз жүрүүгө уруксат бар экенине карабастан, “катталбапсың” деп ири суммада акча алышканын айтып арызданган. Өмүрбек мырза мындай мыйзамсыздыкка чек коюуну убада кылган эле.