Ысык-Көл
Кар көчкү түшүү коркунучу пайда болгон Ак-Суу районунун Каракол-Эңилчек автоунаа жолунун 45-90-чакырымдарында коопсуздукту камсыздоо үчүн 24-марттан 2-апрелге чейин артиллериялык куралды колдонуп, кар көчкүсүн атайылап аткылап түшүрүү иши жүргүзүлүүдө. Аталган аймакта Өзгөчө кырдаалдар министринин Ысык-Көл облустук башкармалыгынын калкты жана аймактарды коргоо бөлүмүнүн башчысы Б.Сасыманов баштаган ыкчам топ жана Коргоо министрлигинин Кой-Таш шаарчасындагы артиллериялык тобу иш алып барууда.

Нарын

ТОЮТ ТАРТЫШТЫГЫ ҮРӨНДӨН КУРУ КАЛТЫРДЫ
Акыйкатчы Турсунбек Акун Ат-Башы районуна болгон иш сапары учурунда Биринчи Май айылынын тургундары менен жолугушуу өткөрүп, жергиликтүү жашоочулар акыйкатчыдан арпа үрөнү жана күйүүчү май боюнча жардам берүүнү суранышты. Ат-Башыда ушул кезде талаада калыңдыгы 70 сантиметрге жеткен кар жатат. Малдын баары короодо кол карап турган учур. Ал эми бир боо чөп 400 сомго жетти. Кыштын узак болушу камдаган тоюттун тартыштыгын жаратып, айылдык тургундар жазгы себүүгө сактап коюшкан арпа үрөнүн малга берүүгө аргасыз болушту. Эми үрөндүк арпа керек. Ошондой эле картошкаларын да жем катары малга берип жаткандар болууда.

Кубаныч Сыдыков
kenesh@super.kg