2-май күнү Алмазбек Атамбаев КТРКга маек курду. Ажонун айткан ойлорунан улам өкмөт башчы экөөнүн ортосунда пикир келишпестик пайда болгону байкалып жатты.

БАШ КЕСМЕК БАР, ТИЛ КЕСМЕК ЖОК
Премьер Өмүрбек Бабанов өзүнө карата айтылып-жазылып жаткан сындардан чарчады көрүнөт, сөз эркиндигин ооздуктоо пландарын ачыкка чыгарды. Ал парламентте жалпыга маалымдоо каражаттары тууралуу мыйзамды катаалдаштыруу демилгесин көтөрдү. Бабановдун айтымында, буга басылмаларда ушак-айыңдарга көп орун берилип, ал үчүн жоопкерчиликтин жоктугу себеп болуптур.
Бабановдун демилгеси, албетте, журналисттерге жаккан жок. Бир эмес, эки президент, эки кландык башкаруу менен чабышып, жанды оозго тиштеп жүрүп жетпедик беле, сөз эркиндигине? Анда биз эмне үчүн Баш мыйзамды өзгөрттүк? Парламенттик башкарууну эл жыргаганы үчүн тандаган эмес да, туурабы? Президенттин таасирин, бийлигин азайтып, Жогорку Кеңеш менен өкмөттүн ролу бекеринен күчөгөн эмес. Бири-биринин кемчилигин коркпой-этпей айтып турсун, жарабайбы, экинчисин, үчүнчүсүн кызматтан алууга күчү жетсин деген максат менен бүгүнкү абалга келдик. ЖМК чөйрөсү да алгачкы эки ажо орноткон капасынан учуп чыгып, журналисттер соңку эки жылда эркин басып, ой-пикирин ээн билдирип калышпадыбы. Же Өмүрбек мырза Атамбаев, Отунбаева же ошол эле Текебаев сыяктуу куугунтукка кабылбай, оппозицияда жүрүүнүн азабын тартпагандыгы үчүн, балким, сөз эркиндигинин баасын билбегенден улам ушундай кооптуу жана тобокел жолго баш багып жаткандыр...

“КЕТСИНИЗМдин” АРТЫ МЕНЕН КЕЛГЕНДЕР
Бабановдун калпыс кадамдары муну менен эле токтободу. Ал өткөндө Ташиев баштаган оппозициянын пикеттеринен тажаган болсо керек, “митингдерге үч жылга мораторий жарыялоо керек” деп чыкты. Алмазбек Атамбаев жогоруда берген маегинде: “Демократиялык мамлекетте митингдер – мыйзам ченемдүү көрүнүш. Бирок митингдерден кийин революция, төңкөрүш болуп кетет деп чочулайбыз. Биз митингдерге көнүшүбүз зарыл. Европада керек болсо күн сайын митинг өтөт, эл өз иши менен алек болуп жатат”,- деп билдирди.
“Келиндин биринчи келгендегиси эстен кетпейт” деп коюшат. Анын сыңарындай, Бабанов эгерде 7-апрелде эмне менен алек болгонун эстей албаса, Атамбаев аны унута элек. Курманбек Бакиев митингдерди өткөрүү жайларын чектеп, митингчилерди "Ала-Тоо" аянтынан алыстатуунун амалын издеген. Керек болсо Бишкек шаарынын экс-мэри Нариман Түлеев шашылыш фонтан кура койгону кечээ жакында эле болуп өткөн окуялар эмеспи. Буга чейинки бийликтин “менин айтканымдай болот” деген өкүм зордугу, митингдердин өткөрүлүшүнө тоскоолдук көрсөтүшү, кезинде сөз эркиндигин муунткандыгы төңкөрүшкө жеткирген. Дал ушундай чектөөлөргө каршы чыгып, Апрель окуясында 100дөй эр жигит жанын бергенин, ушунча жыл туура эмес жүргүзүлүп келген саясаттын айынан Июнь окуясында жүздөгөн мекендештерибиз бейкүнөө каза тапканын эсибизге түйө жүрсөк экен.