Кочкор районунун Сары-Булак айылындагы орто мектепте 4-май күнү сабак өтүлбөй калганы үчүн айыл тургундары тарабынан акт түзүлгөн эле. Аталган мектептин директору Дайырбек Айдарбековдун айтымында, 4-майда ишембилик уюштурулган. Ошого байланыштуу мектепте сабактар өтүлбөй калган. Акыйкатчы институтунун Нарын облусундагы өкүлү Кочкор райондук билим берүү бөлүмүнө мектептеги сабактардын себепсиз өтүлбөй калгандыгы тууралуу маалымат берүү талабы менен кайрылган. Кочкор райондук билим берүү бөлүмү мектептерге ишембилик өткөрүү боюнча эч кандай көрсөтмөлөр берилбегендиги, эгерде ишембилик өткөрүү боюнча көрсөтмөлөр берилсе, сабактан кийинки мезгилде өткөрүлө турганын айтышкан. Ошондуктан мектеп директору өз билемдиги үчүн Кочкор районунун жетекчилиги тарабынан сөгүш алды. Ал эми окуу бөлүмүнүн башчысы А.Шайымбетова менен тарбия иштери боюнча директордун орун басары Т.Бакиров кызмат ордуларынан бошотулушту.