Ысык-Көл ИИБине белгисиз бирөө персоналдуу компьютерлердин оперативдик системдерине зыян келтире турган «Borubash-Mirlan» жана «Konurbai» деген компьютердик вирустарды түзүп, бүтүндөй облуска таратып жаткандыгы тууралуу маалымат түшкөн. Ыкчам-иликтөө иш-чараларынын жүрүшүндө 1989-жылы туулган Ак-Суу районунун Бөрү-Баш айылынын жашоочусу, Касым Тыныстанов атындагы Ысык-Көл мамлекеттик университетинин информатика жана математика факультетинин 5-курсунун студенти О.М. кармалды. Өз күнөөсүн моюнуна алган студент вирустарга каршы «Кашгарский меч» программасын иштеп чыкканын да маалымдаган. Учурда вирусту таратканы үчүн кылмыш иши козголуп, тергөө иштери жүрүп жаткан маалы.
О.М. кылган иш, албетте, кылмыш болуп эсептелет. А бирок Кыргызстанда ушул жигит сыяктуу заманбап техника жаатын «ичип-жеген» адистин бар экени кубандырды. Вирусту эле эмес, ага каршы программаны ойлоп табуу да компьютердик адистердин мактоосуна алынчу иш. Эгерде жигиттин билимин, дареметин туура багытка жолдоп, мыйзамдуу программаларды иштеп чыгарууга шарт түзүп берсе, мамлекетке пайдасы тиери анык. Баарыбызга белгилүү болгондой, вируска каршы программалар чет өлкөлөрдөн сатылып алынат. Колдоо көрсөтүлсө, мүмкүн, өзүбүздүн эле кыргыз жигити пайдалуу программаларды жасап берип турмак...