11-июнь күнү кандуу Июнь окуясынан эки жыл өттү. Бул күнү Ош шаарынын кире беришинде Манастын айкелинин ачылышы болуп, ачылыш аземге президент Алмазбек Атамбаев катышты. «Ошко мейманга келген конокторду Манас атанын тосуп алышы өзгөчө маанилүү. Анткени кыргыз эли эзелтеден жакшы бир иш баштаса да же жоого каршы аттанып жатса да «айланайын, Манас ата, колдой көр!» деп айкөлдүн арбагына сыйынган. «Манастап» ураан чакырып, сан колдон коркпой жоого кирген. «Кулаалы таптап куш кылдым, курама жыйып журт кылдым» деп биримдиктин маанисин элибиз дайыма өзгөчө белгилечү. Кырк уруудан куралган кыргыз элин азыр да көрө албай, бутуна тура албай, чалынып жыгылса экен деген күчтөр көп. Ошолор бизди кыргыз-өзбек, кыргыз-тажик кылып кайраштырып, ортобузга от жагып жатышат. Бизди кагыштырып, түндүк-түштүккө, облус-облустарга бөлүп, керек болсо айылдарга чейин бөлүп-жарганга даяр.
Ал эми Манас атабыз эч качан элди урууга, улутка бөлгөн эмес. Анын кан досу Алмамбет Кытайдан келсе, кырк чоросу кырк уруунун, ар улуттун өкүлдөрү болгон. Сүйүп алган жары Каныкей Букара ханы Темиркандын кызы Санирабига болгонун бардыгыбыз жакшы билебиз.
Манас атабыз Алтайдан Кытайга, Тянь-Шань тоолоруна чейинки көчмөн урууларын «кыргыз» деген бир элге бириктирип, ынтымакташтырып, бир туунун алдына чогултуп, зор мамлекет курган»,- деп Алмазбек Атамбаев айкөл Манастын айкелин ачып берди.