Өткөн жумада Камчыбек Ташиев "Ата Журт" партиясынын лидерлик кызматын Садыр Жапаровго өткөрүп бергенин маалымдаган эле. Көпчүлүгү "эмне үчүн лидерликтен кетти?" деген суроого жооп таппай келишкен. "Кээ бир депутаттар партиянын кызыкчылыгын өздөрүнүн кызыкчылыгы менен алмаштырып алышты. Айрымдары биздин партияда туруп министр да болушуп, көз караштарын кайсы багытка өзгөртүп жибергенин көрдүк. Андыктан бүгүн партиябыздын катарын тазалап, жаштарды тартышыбыз керек",- деди Камчыбек Ташиев.
Ошондой эле Камчыбек мырза жакында Баш мыйзамды өзгөртүү үчүн кыймыл түзүлөрүн билдирди. Кызыкдар болгон жарандар тобунун демилгеси боюнча жаңы Конституциянын долбоорун даярдап чыгып, парламент же референдум аркылуу Баш мыйзамды өзгөртүүгө аракет жасашат. Ташиев муну менен эле чектелбей, жергиликтүү Кеңештердин шайлоосуна карата бардык ишти өз колуна аларын билдирди.