“Чабактарын гана кармап, киттерине алыңар жетпей жатат” деген сындар таасир эттиби, Коррупцияга каршы күрөшүү кызматы катуу аракетке өттү. "Оппозицияны кысымга алышууда" деп саймедиреп чыккандардын да оозу басылар, эми кезек өлкөнүн Социалдык өнүктүрүү министри Равшан Сабировго жетип, 4-июлда аткаминердин үйүн тинтүүгө алышты. Маалыматтарга ылайык, министрдин жардамчысы Тохир Мирзаметов пара менен кармалып, тергөөдө аны “шефинин” буйругу менен алгандыгын айткан. Ал бала асырап алуу боюнча алектенген чет элдик компаниядан 30-июнда 5 миң доллар алып, кийин 4-июлда 10 миң доллар алып жатканда колго түшкөн.
Тинтүүдө министрдин үйү таза чыккан. Андыктан бул жардамчынын жалаасы да болуп калышы ыктымал. Министр өзү УКМКга суракка чакырылганын билдирди. Эске салсак, Равшан Сабиров министрлик кызматка "Ата Мекен" фракциясынан дайындалып барган.