Быйылкы жылдын 1-сентябрынан тарта Нарын шаарынын мектептеринде окуучулар үчүн окшош форма киргизилет. Бул тууралуу Нарын шаарынын вице-мэри Салтанат Эсенаманова: “2012-2013-окуу жылдарында мектеп окуучуларына бирдей форма кийүү талап кылына баштайт. Өз каалаганындай кийинүүгө тыюу салынмакчы”,- деди. Анын айтымында, форма заманбап үлгүнү эске алуу менен тигилген жана баасы да базар наркынан төмөн. 1-4-класстын окуучуларынын формасы – 780 сом, 5-8-класс – 1060 сом, 9-11-класстагылар үчүн – 1200 сом турат. Нарын тоолуу аймак болгондуктан, форманын жылуу варианттары да каралууда, андыктан алар да жакын арада сатыкка түшөт.
Форма сатып алуучу ата-энелердин эсине: 12-30-август күндөрү Нарын шаарындагы “Намыс” спорт комплексинде мектеп жарманкеси өтөт.