7-август күнү ЖКнын депутаты Нариман Түлеевдин укугун коргоо комитети маалымат жыйын уюштуруп, 20-августтан тарта жол тосуу, жөө жүрүш жана ачкачылык акцияларын баштай тургандыгын айтышты. Буга чейин аталган акцияларды өткөрүүгө Рамазан айы менен туристтик сезон шылтоо болгон. Эми күзгө жакын учурда тергөө изоляторунда жаткан депутатты үй абагына чыгаруу үчүн жең түрө киришишет экен. “Комитетте колдоочулардын саны канча?” деген сурообузга Түлеевдин кеңешчиси Апсаматов Аскат: “Баланча деп так сан айта албайм”,- деп жооп берди. Айтмакчы, 20-августка чейин коррупциялык иштерге тиешеси бар деп шектелип жаткан эл өкүлүнүн тагдыры ачыкталып, Түлеевдин адвокаттары төгүнгө чыгарып жаткан маалыматтар далилденсе, анда тарапташтары акцияларды токтотушат. Ошондой эле алар “Апрель байрагы” бирикмесинин иш-аракеттерине нааразы. “Булар өздөрүн революционер кылып көрсөтүп алышты. Алардын эч кимисинин жакыны 7-апрель күнү каза болгон эмес. Аида Салянова кимге иш козгобосун, “Апрель байрагы” “ошол кишилер камалсын” деген талап менен чыгат. Көрсө, алардын башында Аида Салянованын агасы Калыбек Салянов турат экен. Эмил Каптагаев Салянованын жакын кудасы экен, ошондуктан баласынын ажылык сапар боюнча былык иштери басылды. Эмнеге коррупционер делген Жантөрө Сатыбалдиевге козголгон кылмыш ишин жаап коюшту? Өлкөнү экиге бөлмөкчү болгон Үсөн Сыдыков үй камагында. Аларга караганда Нариман Түлеев “Кыргыз темир жолу”, Бишкек шаары үчүн көп иштерди жасаган”,- дешет "түлеевчилер".