Быйыл Таластагы Киров суу сактагычында суу аз. Бул ысык жана кургакчыл жайдын кесепетинен. Аталган суу сактагычтагы суунун 80-85 пайызын Казакстандын Жамбыл облусу талаа суугаты үчүн алат. Тактап айтканда, 120 миң гектар аянты сугарылат. Калган суу Талас облусунун Манас районунун айрым айылдарына кетет. Андыктан келерки жылы суу тартыш болуп, Жамбыл облусуна суу жетпей калышы мүмкүн экенин кыргыз адистери айтып чыгышууда.
Киров суу сактагычы 1976-жылы курулуп бүткөн жана ага 550 миллион м³ суу батат. Суу сактагычтын оңдоп-түзөө иштеринин көбүн Казакстан тарап аткарат.