Какач бирөөлөрдүн тарагы аркылуу да жугат десеңиз, анда жаңылышасыз. Тарак аркылуу жукпайт. Ал өзүбүздүн ички органдардын таасиринен улам пайда болгон организмибиздин реакциясы. Чачты бат-бат жууй берсе майлуулугу кетип, кургап, баш теринин абалын начарлатып жиберет. Чачтын абалына карап тандалган шампунь баш терини жакшыртат. Ошондуктан табигый заттардан жасалган шампунь тандаганыбыз туура. Чачты баттан тарап туруу какачтын жок болушуна жардам берет. Бирок тарайт деген ушул экен деп катуу тарай берсеңиз, баш териңизди жабыркатып алышыңыз ыктымал. Ошондуктан жай, башыңызга акырындан тийгизип тарашыңыз керек.

КАКАЧКА КАРШЫ МАСКАЛАР

• Сыр идишке 4 аш кашык зайтун майын жана жарым лимондун ширесин кошуп, чачтын түптөрүнө сыйпаңыз. Масканы 20 мүнөт кармаган соң жууп салыңыз. Мындай ыкма чачыңызды калыбына келтирип, какачтын жок болушуна шарт түзөт.
• Эгер майлуу чачтын ээси бол­со­ңуз, анда пияздын 1 аш кашык ширесине 2 аш кашык арактан кошуп туруп сүртсөңүз, какачыңыз сен көр, мен көр жоголот.
• Кызылчанын суусу да какачты тез кетирүүгө жардам берет. Ал үчүн таза жуулган кызылчаны экиге бөлүп кайнатып, кайнатма менен башыңызды жуусаңыз, какачтан арылып, жыргай түшөсүз.
• Эки жумуртканын сарысы, 1 аш кашык лимон ширеси жана бир чай кашык зайтун майынын аралашмасын чачыңызга сүртсөңүз да жакшы жыйынтыкка ээ болосуз.

Дамира Арстанова
kenesh@super.kg