Учурда «Кара-Суу» базарында 80 контейнер жайгашкан жер сатылып кеткен. Жакында эле жер ээси эскертпестен сатып жибергенине нааразы болуп, соодагерлер маалымат жыйын өткөрүштү. «Кара-Суу» базарынын «Адилет» профсоюз уюмунун төрайымынын орун басары Туратбек Садыровдун айтымында, 80 контейнердин соодагерлери жерге ээлик кылган Мурат Жээнбеков жана Кенже Жээнбекова менен жылына 1 жылдык мөөнөт менен келишим түзүшкөн. Быйылкы келишиминин мөөнөтү 2012-жылдын 31-декабрына чейин болгон.
«Биздин колдогу келишимге карабай мыйзамды одоно түрдө бузуп, Жээнбековдор 2012-жылдын 13-июлунда контейнер жайгашкан жерди Сагын Надыров деген жаранга 600 миң долларга сатып жибериптир. Жерди сатып алган жаран ал жерге супермаркет курууну пландаштырып жатканы бизге маалым болду. 30-июль күнү жерди сатып алган С.Надыров бизге келип 1-августтан ал жерди бошотууну талап кылды. Эгерде бул маселе мыйзам чегинде чечилбесе, анда биз ар кандай кадамга барышыбызды алдын ала эскерте кетебиз»,- дейт Туратбек Садыров. Ал жердин мурунку ээлери Жээнбековдор келишимдин мөөнөтү аяктай электе мыйзамды одоно түрдө бузгандыгы, соодагерлерди эскертүүсүз контейнерден чыгарып, жумушсуз калтырып жаткандыгы үчүн Ош облустук райондор аралык сотуна кайрылышканын да кошумчалады.
Адвокат Наркул Абдуллаевдин айтымында, Жээнбековдор контейнер ээлери менен 1 жылдык келишимди мыйзамсыз түзгөн. Анткени келишим түзүү КРнын Жарандык кодексинин №556-беренесине ылайык, алгач 5 жылга, кийин 15 жылга чейин түзүлөт.
Маалымат жыйынынын уюштуруучулары, соодагерлер 80 контейнердин ар биринде 2-3төн адам иштей тургандыгын айтып, жумушсуз калган үй-бүлөлөрдүн тагдыры эмне болору туурасында тынчсызданып жаткандарын билдиришти. «Базарда иштеген ар бир ишкер чоң суммадагы насыя алып, ишин жүргүзүп жатат. Мисалы, мен өзүм эле 50 миң доллар насыя алгам. Башка ишкерлер да чоң суммада насыя төлөшөт», - дейт Т.Садыров.
Ошентип, учурда ишкерлер жердин кайра кайтарылышын, ал эми жер ээлери менен жеке ишкерлер 1 жылга эмес, 15 жылга келишим түзүшүн талап кылып жатышат.

Уулбү Каныбекова
оsh@super.kg