Улуттук коопсуздук кызматынын өкүлдөрү кезектеги текшерүүдөн кийин Бишкек-Ош жолундагы тоннелдин абалы начар экендигин маалымдашты. Алардын айтымында, тоннель жарык менен толук камсыздалган эмес. Бүгүнкү күнгө карата 39 чырак иштен чыгып, жарабай калганы анык болду. Байкоо жүргүзүүчү 10 камера иштеп жатканы менен, караңгыда адамдар эмес, унаалар араң көрүнөт. Мындан сырткары желдеткичтер жетишсиз, тоннелдин ичи чаңга толуп калууда.
Мына ушундай көйгөйлөр тууралуу Жайыл райондук Улуттук коопсуздук кызматынын кызматкери Чыңгыз Мураталиев кабарлады. Ал белгилегендей, 2000-жылы чоң жүк ташуучу унаа тоннелдин ичинде бузулуп калып, чыккан газдан артта токтоп турган унааларда отургандар ууланып, 6 адам көз жумган. Бул окуядан кийин гана тоннелге желдеткичтер коюлган. Белгилей кетсек, тоннель аркылуу өтүү үчүн төлөнүп жаткан каражат бул объектини камсыз кылып турган негизги булак болуп эсептелет.