ИИМ чуусу бүтпөгөн энергетика тармагындагы дагы бир ири коррупция булагын таап чыкты. Энергетика жана өнөр жай министрлигине караштуу Отун-энергетикалык комплексин көзөмөлдөө мамлекеттик департаментинин жетекчилиги кызмат абалынан кыянатчылык менен пайдаланып, мамлекетке 5 миллион сом көлөмүндө зыян келтиргендиги белгилүү болду. Жетекчилик электр энергияны сатып алып, кайра электр энергиясын бөлүштүрүп таратуучу компанияларга сатуу менен алектенген «К» фирмасына өтө арзан бааны койгон. Мисалы, «К» фирмасы Бишкек жылуулук электр борборунан 1 кВт саат үчүн электр энергияны болгону 0,68 тыйындан сатып алып турган, ал эми аталган борбордогу электр энергиянын өздүк баасы 2 сом 8 тыйынды түзөт. Бул иш боюнча Башкы прокуратура 2012-жылы августта «Кызмат абалынан кыянаттык менен пайдалануу» беренеси боюнча кылмыш ишин козгоп, иликтөө жүргүзүүдө. Бул ишкананын мыйзамдуу жана көмүскөдөгү кожоюндары ким экендиги боюнча да иликтөө жүргүзүлүүдө.
Бул окуя Исхак Пирматов боюнча козголгон кылмыш ишин эске салат. Ага «Кыргызнефтегаз» ишканасын мыкчып турганда бензиндин базардагы 1 литрлик баасы 28-30 сом болуп турганда жеке менчик ишканага 8-9 сомдон сатып, мамлекетке 258 миллион сомдук зыян алып келген» деген айып тагылган. Депутатты кылмыш жоопкерчилигинен фракциялаштары куткарып кеткен. Жеп-ичмей, кызматтан ашкере пайдаланмай дегенден дегеле кутулбайт окшойбуз.