31-октябрда Башкы прокуратура «Ата Журт» фракциясынын депутаты Камчыбек Ташиевдин баш коргоо чарасын өзгөртүү өтүнүчү менен Биринчи Май райондук сотуна кайрылды.Ташиевге Башкы прокуратуранын сунушу менен соттук-психикалык текшерүү өткөрүлүп, анын жыйынтыгынын негизинде үй камагына чыгаруу өтүнүчү сотко жолдонгон.

ПСИХИАТРИЯЛЫК ЭКСПЕРТИЗА...
Камчыбек Ташиевдин баш коргоо чарасын өзгөртүп, үй камагына чыгаруу өтүнүчү менен анын адвокаты эмес, Башкы прокуратуранын чыкканы дагы өзүнчө маселе жаратты. Жарандык кодекске ылайык, психикалык абалды аныктоого сот экспертизалык иликтөө жүргүзүүнү белгилей алат. Жөнөкөйлөтүп айтканда, Камчыбек мырза психиатрия боюнча жоон топ адистердин тыкыр текшерүүсүнөн өткөндөн кийин гана ушундай өтүнүч ачыкка чыгып отурса керек. Буга чейин депутаттын Ак үйдүн дарбазасынан ашып түшүүсү чоң талкууну жараткан. Айрымдар аны баланын ишине теңесе, кээ бири логикага сыйдыра албай убара чегишкен болчу.

СОТ ОТУРУМУ КЕЧИГҮҮДӨ
31-октябрь күнү депутаттын жактоочусу «мына-мына, чыкканы калды» деп жар салганы менен, ал күнү журналисттер канчалык УКМКнын дарбазасын аңдышпасын, Ташиевдин карааны да көрүнгөн жок. Көрсө, соттук отурумдун өтүүсүнө Башкы прокуратуранын өкүлү келбей калганы себеп болуптур.
Депутаттын баш коргоо чарасын кароо 1-ноябрга белгиленген болчу. Бирок белгисиз себептер менен соттук отурум бул күнү да болгон жок. Биринчи Май райондук соту Башкы прокуратуранын өтүнүчүн кароо 5-ноябрга жылдырылганын кабарлады. Оппозиция лидерлеринин тарапкерлери эгер 2-ноябрда саат 10:00гө чейин депутаттар бошотулбаса, Бишкек шаарын көздөй Жалал-Абаддан жөө жүрүш башталарын эскертишкен.