Парламент 8-ноябрдагы жыйынын эки чоң маселе менен баштады. Биринчиси, кышка карата даярдык боюнча өкмөттүк саат болсо, экинчиси камактагы депутаттардын, айрыкча Камчыбек Ташиевдин тагдырына күйгөн санаалаш эл өкүлдөрүнүн билдирүүлөрү болду.

ТАППАСАҢ СЫЙПАЛАП КАЛ
Өкмөттүк саатка ачуу-таттуу сөздөрүн даярдап келген депутаттардын «кызыл килемине» 4 министр менен премьердин аймактардагы өкүлдөрү (губернаторлор) тосуп алышты. «Жантөрө Сатыбалдиевдин биринчи өкмөттүк сааты болуп отурса, өзү кайда жүрөт?» деп суроо артынан суроо жаадырган эл өкүлдөрү премьердин Ошко иш сапары менен кеткенин угуп деле көпкө тынчый алышпады. Буга чейин чоң жыйындардын бирине түштөн кийин чакырылган премьерди 15 чакты депутат угуп отурган. Өлкөнүн негизги маанилүү кызматында отурган кишини отчёт берүүгө чакырган соң эл өкүлдөрү да тиешелүү деңгээлде маани берип, жыйынга катышуулары керек болчу.

КОШ, АТА ЖУРТ, УУЛУҢ КЕТТИ ОРУСИЯГА...
«Мен саясатты таштап, биротоло Орусияга жашоо үчүн кеткени жатам». 8-ноябрда интернет айдыңында «Ата Журт» партиясынын лидери Камчыбек Ташиевдин ушундай билдирүүсү чыкты. Бул сөздөр Камчыбек мырзага жүргүзүлгөн психологиялык-психиатриялык экспертизанын корутундусунда жазылгандыгы маалым болду.
Анын жактоочусу Икрамидин Айткулов: «Кечээ Камчыбек Ташиевди жана мени эксперттердин корутундусу менен тааныштырышты. Бирок документте жалган көрсөтмөлөр жазылгандыктан, биз алардын жыйынтыгы менен макул эмеспиз. Андагы сөздөрдү Ташиев айткан эмес, корутунду буйрутма жана бир жактуу экени көрүнүп турат»,- деди. Ал психологиялык-психиатриялык экспертизанын жүргүзүлүшүнө Башкы прокурордун тиешеси бар деп шектенүүдө. Жана жалган маалымат үчүн аларды жоопкерчиликке тартуу маселесин сотто көтөргөнү жатат.
Өз кезегинде Башкы прокуратура депутатты мындай экспертизадан өткөрүүгө эч кандай тиешеси жоктугун билдирди. Мыйзамга ылайык, психологиялык-психиатриялык экспертизаны тергөөчү гана дайындай алат. Тергөөчү болсо тергөөнүн жүрүшүнө таянып, кандайдыр бир маалымат берүүдөн карманууда. Эгер экспертизадан өткөрүүгө жактоочу каршы чыкса, анда текшерүү сот аркылуу белгилениши керек. Маселе экспертизанын дайындалышы боюнча Ташиевдин жактоочусуна маалымат берилбей калганында болууда.
8-ноябрда ЖКнын чоң жыйынында «экспертиза кандай негизде өткөрүлгөнү боюнча Башкы прокурор отчёт берсин» деп депутат Жылдызкан Жолдошева талап кылды. Ал эл өкүлүнүн психологиялык-психиатриялык абалын текшерүүнү Ташиевдин жана анын шайлоочуларынын үстүнөн шылдың кылуу катары баалады. «Күч структураларынын ишине кийлигишип, камактагыларды коргобогула» деген депутаттар да четтен чыгууда.