Бул аптада Абдулла Юсуповго байланыштуу дагы бир окуянын изи ачыкка чыкты. 2011-жылдын октябрынан 2012-жылдын март айына чейин аны менен бир камерада отурган Нургазы Бакаевдин ИИМдин тергөөчүсүнө берген көрсөтмөсү көрсөтүлдү. Ал: «Юсупов «Ата Журттун» депутаттары түрмөгө келип турганын, президенттик шайлоо учурунда эгерде Камчыбек Ташиев президент болсо, СИЗОдон чыгарыларын айтып берчү. Камерада чогуу отурган Азамат Өмүралиевди «Асылбек Текебаев мени Июнь окуясына аралаштырган деп айт» деп сабаган. Анын ордуна Өмүралиевдин иши боюнча сот менен сүйлөшүп берерин айткан. Атүгүл камерада отуруп алып соттун телефонуна чалган. Юсупов «шеф, шеф» деп кайрылып, Акжолов деген милиция кызматкерине дамамат чалып, отчёт да берип турчу. Бир жолу мага да «Текебаев, Шер жана Төлөгөновго каршы көрсөтмө бере алган балдарды топто» деген. Эгерде анын сөзүн аткарсам, акча берем деп айткан»,- деп суракта билдирген.
Ошондой эле Нургазы Бакаев анын сөзүн ошол учурда камерада отурган эки адам тастыктап бере аларын айткан.