12-февралда Баткен шаарынын мэри шайланды. 28-январда болгон шаар башчыларын шайлоодо талапкерлер жетиштүү добуш ала албай, шаар мэри шайланбай калган эле. Экинчи жолу шайлоо болуп, бул жолу 6 партиядан талапкер­лерди көрсөтүштү. «Ата Журт» жана «Бүтүн Кыр­гызстан» партиялары биригип, Мамашарип Орозбаевди талапкерликке сунушташты. Ал эми «Замандаш-Сов­ре­меник», КСДП, «Республика», «Ата Мекен» саясий партиялары коалиция тү­зүшүп, Жаныбек Жалаловдун талапкерлигин көрсөтүшкөн.
Шайлоого 31 депутат катышып, 12 депутат Мамашарип Орозбаевге, ал эми 18 депутат Жаныбек Жалаловго добушун беришкен. Ал эми 1 бюллетень жараксыз деп табылган. Натыйжада 18 добуш менен Баткен шаарынын мэри болуп Жаныбек Жалалов шайланды.
Жаңы шайланган мэр буга чейин КРнын Өк­мө­түнүн Баткен облусундагы ыйгарым укуктуу өкүлүнүн аппарат жетекчиси болуп эмгектенип келген.