Өмүрбек Текебаев Кара-Көл шаардык кеңешинин депутаты, «Жин» деген каймана аты бар, жакында эле бирөөнүн бутуна тапанча менен атып ийип колго түшкөн Алтынбек Арзымбаевди «Ата Мекен» партиясынын мүчөсү эмес» деп билдирди. Анын айтымында, Арзымбаев партияга кирген эмес, депутаттардын тизмесине кошулган. «Ал биздин партиянын мүчөсү эмес жана тизмеге «партиясы жок» деп катталган»,- деди Текебаев.
Бул окуя Бишкек шаарынын Октябрь районунун аймагында болгондуктан, Октябрь райондук ички иштер бөлүмү тарабынан депутат Алтынбек Арзымбаевге 234-беренесинде каралган “Бейбашчылык” боюнча кылмыш иши ачылгандыгын ИИМдин расмий сайты жазып чыкты.
ИИМдин басма сөз катчысы билдиргендей, 6-март күнү Октябрь ички иштер бөлүмүнө 31 жаштагы Урматбек Дүйшекеевден арыз түшкөн. Анын айтымында, 28-февраль күнү, түнкү саат 11лерде, Бишкек шаарынын Токтоналиев-Токомбаев көчөлөрүнүн кесилишинде Алтынбек Арзымбаев аны бутка аткан. Ал ошол эле күнү кармалып, Бишкек ШИИББинин убактылуу кармоочу жайына камалган жана анын жанынан тиешелүү кызмат тарабынан берилген, 9 огу менен пистолет табылган.
Эсиңиздерге сала кетсек, «6-мартта Бишкек шаарында Кара-Көл шаардык кеңешине жаңы эле депутат болуп шайланган Алтынбек Арзымбаев бир ишкерден чоң акча талап кылган. «Разборка» бүткөндөн кийин тапанчасынан ок чыгарган» деген маалыматты Октябрь
РИИББи билдирген эле. Ок жеген адам оор абалда бейтапканага жеткирилген.