• Бишкекте 4-июнь күнү жүргүзүлгөн рейдде эки саат ичинде 104 жол эрежесин бузуу фактысы катталган. Бул тууралуу ИИМдин жол коопсуздук кызматы билдирди.
• Саламаттыкты сактоо министрлигинин маалыматына ылайык, Ысык-Көл облусуна караштуу Жети-Өгүз районунда 31-майдан 3-июнга чейин МИҢДЕН АШУУН киши бекер медициналык кароодон өттү.
• Президент Алмазбек Атамбаев министрликтердин алдындагы КООМДУК БАЙКООЧУ КЕҢЕШТЕРДИН ишин узартуу боюнча буйрукка кол койду.
• Абактагы депутат НАРИМАН ТҮЛЕЕВ ден соолугу кескин начарлап кеткендигине байланыштуу Улуттук онкологиялык борбордо  дарыланып жатат.
• Мамлекет башчы Алмазбек Атамбаев ОҢ РУЛДУУ ТАКСИЛЕРДИ айдоого тыюу салуучу мыйзамды колдогон жок. Аны кайра иштеп чыгуу үчүн ЖКга жөнөттү.
• Жогорку Нарын ГЭС каскадынын курулушу ушул жылдын 12-июнунда башталат жана ага Орусия 31 МИЛЛИОН доллар бөлөрүн «Жогорку Нарын ГЭСтери» ЖЧКсынын башкаруучу төрагасы Игорь Горбенко кабарлады.
• Газдын баасы доллардын курсу көтөрүлгөндүгүнө байланыштуу 4 ТЫЙЫНГА кымбаттады. Май айынан тартып өлкөнүн жалпы керектөөчүлөрү жаратылыш газынын 1 метр кубу үчүн 15 сомдон төлөшөт.
• Кыргызстандагы зыяратчылар тобу МЕККЕГЕ ВЕЛОСИПЕД МЕНЕН барышат. Бул тууралуу топтун жетекчиси Нуркамил ажы Саскеев кабарлады.
• Бишкек шаарынын мэри ИСА ӨМҮРКУЛОВ 14 күндүк кечигүү менен 25-июнда шаардык кеңештин депутаттарына 2012-жылдын отчётун угузмак болду.
• ЖКдагы вице-спикер БАКЫТ ТӨРӨБАЕВ ээлеген кызматынан кетти.
• Бул жумадагы окуялардан улам УКМКнын жетекчиси Бейшенбай Жунусов кызматтан алынып, ордуна БУСУРМАНКУЛ ТААБАЛДИЕВ дайындалды.
• Токтогул гидроэлектрстанциясын калыбына келтирүү үчүн 260 МИЛЛИОН доллар керектелет. Бул тууралуу мамлекеттин тышкы карыздары боюнча мониторинг жүргүзгөн жумушчу топтун мүчөсү Гүлшайыр Абдырасулова билдирди.

Гүлмайрам Сабырбекова
politika@super.kg