• 2013-жылдын биринчи жарым жылдыгында мамлекеттик чек араны мыйзамсыз кесип өткөн 81 ЖАРАН кармалган. Бул тууралуу Чек ара кызматы билдирди.
• Милиция кызматкерлери тарабынан Кыргызстандын аймагында тилемчилик менен алектенген өзбекстандык 19 ЖАРАН чыгарылды.
• Мамлекеттик бажы кызматынын маалыматына ылайык, Кыргызстандан Бажы биримдигине кирген өлкөлөргө товар экспорттоо быйылкы жылдын 5 айында былтыркыга караганда 21 ПАЙЫЗГА төмөндөп, 190 миллион долларды түзгөн.
• 2013-жылы 6 ай ичинде Бишкек шаарында 288 МИТИНГ катталган, анын 127си соттук иштерге нааразычылык билдиргендер.
• Бишкек шаардык ИИББинин маалыматына ылайык, жарым жыл ичинде борбор калаада 5 МИҢГЕ жакын кылмыш иши козголгон.
• Кыргызстанда МУНИЦИПАЛДЫК КЫЗМАТКЕРЛЕРДИН ар бир бешинчисинин жогорку билими жок. Бул тууралуу вице-премьерминистр Тайырбек Сарпашев маалымдады.
  
• Өлкө башчысынын жарлыгына ылайык, улуу муунга КЫРГЫЗ ТИЛИН ҮЙРӨТҮҮЧҮ борборлор өлкөнүн 4 облусунда жана Бишкек шаарында ачылат.
• 2013-жылдын 6 айында жашы жете электер тарабынан жасалган 739 КЫЛМЫШ катталган. Бул тууралуу Башкы прокуратура билдирди.
• ӨКМ билдиргендей, жыл башынан бери өрт өчүрүүчүлөр тарабынан 234 АДАМДЫН ӨМҮРҮ сакталып калган.
• Учурда Ош шаарында 5900 ЖАРАН жумуш издеп каттоодо турат, алардын 2600ү аялдар. Бул тууралуу Улуттук статистика комитети билдирди.
• Орусия америкалык тыңчы ЭДВАРД СНОУДЕНДИ кайтарып берүү боюнча АКШнын өтүнүчүн аткаруудан баш тартты. Бул тууралуу Путиндин кеңешчиси Михаил Федотов айтканын орусиялык ММКлар жарыялашты.
• Мамлекет башчынын жарлыгына ылайык, Мирбек Имаев Улуттук гвардиянын командирлик кызматынан бошотулду. Анын ордуна АСАНБЕК АЛЫМКОЖОЕВ Коргоо министрлигине караштуу Улуттук гвардиянын командири болуп дайындалды.
  
• 21-июль күнү ЖКнын депутаты НАДИРА НАРМАТОВАНЫН уулу Мээримбек Нурдинов эл өкүлүнүн кызматтык унаасында Ош-Бишкек жолунда келе жатып автокырсыкка учурап көз жумду. Андан сырткары эки киши каза болуп, дагы эки киши ооруканага оор абалда жеткирилди.
• Мамлекеттик материалдык резерв фонду быйыл дыйкандардан буудайды 13 СОМДОН сатып алат. Бул тууралуу айыл чарба жана мелиорация министри кабарлады.

Гүлмайрам Сабырбекова
politika@super.kg