44 өлкөгө визасыз режим киргизүү демилгеси көтөрүлгөндө Тышкы иштер министрлигинде, элчилик, консулдуктарда иштегендер чуу чыгарышкан. Алар «өлкөгө террорчулар каалагандай кирип-чыгып калат, коопсуздугубузга коркунуч келет» деп чыгышкан. Чынында, аларды өлкөнүн коопсуздугу эмес, чет элдиктерге виза берүүдө чөнтөктөргө түшүп турган акчадан айрылып калуу коркунучу чочутту десек туура болор эле. Мындай каршылыктарга карабай Өмүрбек Бабанов баштаган өкмөт бул демилгени жүзөгө ашырып, 44 өлкөнүн жарандарына Кыргызстанга визасыз кирүү мүмкүнчүлүгү берилген. Жакында эле бул тизмеге 45-болуп Япония киргизилди.
Жөжө саноочу мезгил деле көп күттүргөн жок. Туризм департаментинин башкы адиси Чубак Оморовдун айтымында, былтыркы жылдын 6 айына салыштырмалуу быйылкы жылдын алты айында Кыргызстанга келген туристтердин саны өскөн. Визасыз режим киргизилген өлкөлөрдөн келген туристтерди алсак, былтыркы жылга салыштырмалуу алар 20 миңге көп келишкен. Эгер жылдын аягына чейин орто эсепте алсак, ал өлкөлөрдөн келген туристтердин саны былтыркыга салыштырмалуу 40 миңге өсөт экен. Албетте, туристтер жөн келишпейт. Алар келген өлкөсүндө ар кандай тейлөө кызматтарынан пайдаланышат. Жол жүрөт, тамактанат, мейманкаларда түнөйт, гид жалдайт, айтор, сөзсүз түрдө акча сарптайт. Демек, элде да, мамлекеттик казынада да алардын акчасы калат.
Экс-премьер-министрдин тушунда башталып, бирок ишке ашпай калып калган демилгелердин дагы бири – «Ачык асман» долбоору. Бабановдун пикиринде, «Ачык асман» режими Кыргызстандагы жергиликтүү авиакомпаниялардын арасында да атаандаштыкты күчөтүп, натыйжада баалар арзандап, тейлөө сапаты жакшырмак. Албетте, бул идеяга жергиликтүү авиакомпаниялар каршы чыгышкан. Чет элдик ири авиакомпаниялар Кыргызстандын рыногуна жолтоосуз келе баштаса, анда жергиликтүү компаниялар банкрот болушат дешет алар. Экономика министрлигинин жоромолу боюнча, жергиликтүү авиакомпанияларга мынчалык коркунуч туулбайт. Тескерисинче, Кыргызстан «Ачык асман» режимине өтсө инвестициялык климат жакшырмак, Түштүк Чыгыш Азиядан Европаны көздөй кеткен учууларда Кыргызстан «аялдама» болуп бермек. Албетте, «Манас» аба майданын жакшыртууга шарт түзүлмөк. Ансыз деле «Манас» аба майданынан АКШнын транзиттик борбору чыгарылат дегенден бери өкмөттө тынчтык жок. Анткени АКШ жыл сайын транзиттик борбор үчүн казынага төлөп келген акчанын ордун толтура турган булак табуу керек. Андыктан аталган аба майданды эл аралык авиахабга айландыруу тууралуу сөздөр көп айтыла баштады. Эксперттердин пикиринде, «Ачык асманга» өтмөйүн «Манасты» эл аралык авиахабга айландыруу жөнүндө сөз болушу мүмкүн эмес.
Айтор, азыркы өкмөттө баягы эле көрүнүш. Чиновниктер өлкөгө, элге пайда келе турган жакка эмес, эскиге, өз чөнтөгүнө пайда түшө турган иштерге тарта беришет. Жергиликтүү авиакомпанияларда, албетте, чиновниктердин кызыкчылыгы, үлүштөрү бар.

politika@super.kg