• Эгемендүүлүк күнүнө карата Ош шаарынын борбордук аянтында мамлекеттик туунун жаңысы илинерин вице-мэр ДАСТАН ХОЖАЕВ айтты.
• Мамлекеттик мүлктү башкаруу боюнча фонд экс-президент КУРМАНБЕК БАКИЕВДИН үй-бүлөсүнө таандык болгон жана улутташтырылган Як-40 учагын 4,2 миллион сомдук старттык баа менен сатыкка койду. Аукцион 27-сентябрда «Манас» аэропортунда өтөт.
• КЫЙМЫЛДУУ МҮЛК салыгын төлөө мөөнөтү 2013-жылдын 1-сентябрына чейин жылдырылды. Эгерде автоунаа салыгы убагында төлөнбөсө,
  2 миң сомдук айып пулга жыгуу каралган.
• «Кыргызтелеком» ААКсынын жаңы төрагасы болуп АЛМАЗБЕК КАДЫРКУЛОВ дайындалды.
• Жогорку Кеңеште парламентаризмди өнүктүрүү жана парламенттин мыйзамдуу ишмердүүлүгүн илимий-укуктук камсыздоо максатында ИЛИМИЙ-ИЗИЛДӨӨЧҮ борбор түзүлдү.
• Мамлекеттик салык кызматы: "2013-жылдын 1-августуна карата республика боюнча салык төлөөчүлөр мамлекетке 298 МИЛЛИОН СОМ карыз, анын ичинен «Тазалык» ишканасы, «Кыргызгаз», «Күрмөнтүцемент» жана «Нарынгидроэнергострой» ААКларынын эң көп бересеси бар".
• Үстүбүздөгү жылдын башынан бери өлкөнүн каналдары менен көлдөрүнө 80 КИШИ чөгүп каза болгон, анын 21и жаш балдар.
• Бишкектин Биринчи Май райондук соту жаратылыш ресурстары боюнча экс-министр ЗАМИРБЕК ЭСЕНАМАНОВ баштаган лицензия берүүчү комиссиянын 6 мүчөсүн актады.
• Вице-премьер ТОКОН МАМЫТОВДУН АЙТЫМЫНДА, кыргыз-тажик чек арасынын 400 чакырымында талаш-тартыш жаратуучу тилкелер бар.
  
• Быйыл Орусия менен Казакстандын чек ара боюнча жогорку окуу жайларына 55 КЫРГЫЗСТАНДЫК жаран өттү.
• Өлкө ичинде 2013-жылдын 7 айында 767 ЖОЛ КЫРСЫГЫ катталып, анда 58 киши жан берсе, 708 адам түрдүү жаракаттарды алган.
• Токмокто 28-август күнү мамлекеттик жана коомдук ишмер СУЛТАН ИБРАИМОВДУН 85 жылдыгына арналган эстеликтин ачылышы болуп өттү.
  
• Бишкекте күйүүчү майдын баасы 1-1,5 СОМГО кымбаттады.
• Кара-Көл шаарында 21-августта ири жол кырсыгы катталып, анда 7 АДАМ КАЗА БОЛУП, бирөө жарадар болгон.
• Билим берүү жана илим министрлигинин маалыматына ылайык, быйылкы окуу жылы 3-СЕНТЯБРДА башталат.
• БУУнун өнүктүрүү программасы билдиргендей, Кыргызстанда башталгыч класстын 400 МИҢ окуучусу мектептен тамактанышат.

Гүлмайрам Сабырбекова,
Эльвира Караева
politika@super.kg