• Жыл башынан бери 87 адам сууга чөгүп каза болгонун ӨКМ кабарлады. Эң көбү Чүй облусунда 31 жана эң азы Ош облусунда 5 адам мындай кырсыктан каза тапкан.
• Бишкектеги Улуттук китепканада 23-сентябрда Мамлекеттик тил күнүнө карата «Кыргызстан» улуттук энциклопедиясынын IV тому коомчулукка тааныштырылат.
• ЖКнын депутаты Ирина Карамушкина: «154 ок атуучу куралга ээлик кылган 58 эл өкүлү бар. Алардын ысымдары ачыкка чыгышы керек жана парламенттин ичинде курал алып жүрүүгө тыюу салынышы шарт»,- деди.
• Өлкөнүн Кызыл китебине сүт эмүүчүлөрдүн 23 түрү, канаттуулардын 53 түрү жана балыктын 7 түрү киргизилип, өсүмдүктөрдүн дээрлик 83 пайызы атайын эсепке алынган.
• Жогорку Кеңеш жаңы Акыйкатчыны 25-сентябрда шайлайт.
• Бажы союзунун эксперттери Казакстанга Кыргызстандан сүт продукциясын ташып кирүүгө карата убактылуу чектөөнү 5 сүт иштетип чыгаруучу ишкана үчүн жойду.
• «Ысык-Көл пароход транспортун башкаруу» мамлекеттик ишканасынын директору Таалайбек Мукашевдин айтымында, мекеме 2003-2010-жылдар аралыгында карыздан улам
  9 чоң кемесинен куру жалак калган.
• Жогорку Кеңештин төрагасы Асылбек Жээнбеков депутаттарды парламентте ачылган кыргыз тилин үйрөнүү боюнча сабактарга жазылууга чакырды.
• Бишкек мэриясы 28-сентябрда өтүүчү шаардын 135 жылдыгын белгилөө үчүн 800 миң сом сарптайт. Стадиондогу чоң концертке орусиялык ырчы Максимдин келүүсү күтүлүүдө.
• Эмгек, миграция жана жаштар министри Алиясбек Алымкуловдун айтымында, өлкөдөгү жумушсуздардын 60 пайызын жаштар түзөт.
• Өмүрбек Суваналиев жана Бегалы Наргозуев баштаган «Каршылык көрсөтүү кыймылы» түзүлүп, анын бет ачар аземи 18-сентябрда болуп өттү.
• Бишкек шаарындагы жылуулук электр борборунун модернизациясы үч жыл жүрүп, анда кубаттуулугу 150 мегаваттан турган 2 турбоагрегаттын орнотулушу пландалууда.
• Быйылкы жылы 14,6 миллион долларды түзгөн саатына 373 миллион киловатт электр энергия экспорттолуп, кышка карата сууну үнөмдөөгө байланыштуу бул көрсөткүч 5 эсеге төмөндөгөн.
• «Кумтөр» боюнча меморандумду парламенттеги коалиция кеңеши 23-сентябрда талкууламай болду, бул маселени 14-сентябрда карап чыккан КСДП фракциясы жалпы пикирге келе албады.

Эльвира Караева
politika@super.kg