Бишкекте 13-ноябрда резонанстуу соттук иштерде жактоочулук кылган адвокат Икрамидин Айткуловду белгисиз бирөөлөр сабап, тоноп кетишкен. Бул окуяны айрымдар мурдагы депутат Камчыбек Ташиевдин кызыкчылыгын коргогондугу менен да байланыштырып жатышат. Кол салган кылмышкерлер анын оң бутун сындырып, бети-башын көк ала кылышыптыр. Жанындагы 10 000 доллар акчасын жана чөнтөк телефонун тартып алып кетишкени белгилүү болду. Эсин жоготкон жактоочу алгач жандандыруу бөлүмүнө жаткырылып, кийинки күнү гана жалпы палатага которулган. Учурда бул иш боюнча кылмыш иши козголуп, иликтөө жүргүзүлүүдө. Абалын сурап, окуя кандай болгонун өз оозунан угалы деп барганыбызда, бизди маңдайкы тиши сынган Айткулов жылмайып кабыл алды.

– Икрамидин мырза, окуянын кандай болгонун айтып берсеңиз?
– 13-ноябрь күнү кечки саат 9да үйгө келгем. Уулум дарбазаны ачып коюп үйгө кирип кеткен, а мен унаамды гаражга киргиздим. Кайра сыртка чыгып, үйүбүзгө жакын жердеги дүкөнгө бараткам. Арттан катуу сокку болуп, эс-учумду жоготтум. Өзүмө келгенимде башым ооруп, жүрөгүм айланып жатыптыр. Ордуман турайын десем, алым жок. Дене боюм ооруп жатыптыр. Бутум ийге келбейт, сынганын байкадым. Бутумду атайын сындырышыптыр.

 – Эмне үчүн атайын дейсиз? Эмнеден шекшип жатасыз?
– Эгер алардын максаты тоноо болсо, анда эсимди жоготкондо эле тоноп кетип калышмак. Эмнеге бутумду сындырмак эле? Мени баса албай турган кылып, адвокаттык ишмердүүлүгүмдү бир аз да болсо токтотуп турууну жана мени коркутууну каалагандар жасашты.

– Алар кимдер болушу мүмкүн? Адвокаттык ишмердүүлүгүңүзгө тиешелүүбү?
– Ооба, ошондой. Анткени менин эч ким менен финансылык аласа-бересем жок. Анчалык душманым деле жок. Биринчи себеп катары «Альфа Телеком» («Мегаком») боюнча ишти ойлойм. Анткени Алмазбек Абеков «Мегакомду» жетектеп турганда мамлекеттин казынасына түшкөн салыкты
800 миллиондон 4 миллиард сомго чейин көтөргөн. Азыркы жетекчилиги оңбогондой сумманын нугун сол чөнтөккө буруп жатканын айтып келгенмин. Экинчиден, мурдагы социалдык өнүктүрүү министри Равшан Сабировдун ишин да айтмакмын.

– Сизди алгач тергөөчүлөр менен иштешүүдөн баш тартты дешти?
– Ошого таң калып жатам. Өзүмө келгенден кийин мага алгач Бишкек шаардык
ИИББинин башчысынын орун басары Александр Белунскас келди. Ал сурак алды, анын бардык суроолоруна жооп бердим. Өз ойлорумду айтканда анын маанайы түштү. Албетте, аларга менин «мунун артында бийлик турат» дегеним жага бербеди. Анан менин жоопторумдан кийин ал сыртка чыгып, «Айткулов кызматташуудан баш тартты» деп айтыптыр. Кийин «биз аны кызматташууга араң-араң көндүрдүк» дептир. Мен, тескерисинче, күнөөлүүлөрдүн табылышына абдан кызыкдармын.

– Бул ишти ички иштер министри Абдылда Суранчиев өз көзөмөлүнө алды. Жыйынтык чыгарына ишенесизби?
– Азыр алар «бул – тоноочулук, биз мунун бетин ачабыз» деп жатышат. «Төрт киши кол салган» деп жатышат, ким көрүптүр аларды? Мен өзүм ким, кантип сабаганын билбейм, анан алар кантип билишет? Макул, ачышсын. Ага каршы эмесмин. Бирок ишенбейм, анткени көзүм жетпейт. Калп эле эл көзүнө иштеп жаткандай түр көрсөтүшүүдө. Бишкек шаардык ИИББинин башчысы Мелис Турганбаев «иштин бети ачылышына аз калды» дейт. Ал тантып жатат! Болбосо далилдесин, ушул кылмыштын бетин ачсын. Мен ошону көргүм келет.

Гүлмайрам Сабырбекова
politika@super.kg