ЭКС-СПИКЕРДИН КЕЛИНЧЕГИ ТИЛИНЕН ЖАҢЫЛДЫ
Өткөн аптада Жогорку Кеңештин мурдагы төрагасы, «ата журтчу» депутат Ахматбек Келдибековдун жубайы Аида Токтоматова «ММКларга жарыяланган мүлктөрдү ак эмгегибиз менен иштеп тапканбыз. Күйөөмдү негизсиз каралагандары үчүн журналисттерди чөгөлөтүп кечирим суратам» деген. Тилинен жаңылганын түшүндүбү же жакындары «түшүндүрүштүбү», айтор, А.Токтоматова кийин журналисттерден кечирим сурады.
Ошол эле тапта Ахматбек Келдибековдун тарапташтары анын туулган айылы Сопу-Коргондон Ош–Эркеч-Там жолун бууп, Кытайдан бери келе жаткан жүк ташуучу машиналар бир нече чакырымга созулган тыгында калышты. 28-ноябрь күнү депутаттын тарапташтары Бишкекте маалымат жыйын берип, алардын бири И.Аттокуров: «Бийлик Ахматбек Келдибековду бошотпосо, биз Бишкек–Ош жолун тосуп, Ош жана Жалал-Абад облустук администрацияларын басып алабыз. Ал жакта 3 облус, 3 миллион эл бар. Андан соң Бишкекке келип, борбордук бийликти кулатабыз»,- деди.

АБАКТАРДА КАЙРАДАН АЧКАЧЫЛЫК...
Ахматбек Келдибеков кармалгандан кийин 26-ноябрда «Бишкектин 1-СИЗОсунда отургандар ачкачылык жарыялашты» деген маалымат чыкты. Журналисттердин «Бул окуя Келдибековдун камалышына байланыштуу болушу мүмкүнбү?» деген суроосуна анын адвокаты Татьяна Чильникина «бул аракеттер Келдибековдун беделине шек келтирүү үчүн атайы жасалууда» деген пикирин билдирди. Көп өтпөй,
1-СИЗОдогу ачкачылык акциясы Лимонти деген каймана аттуу Алмазбек Сулаймановду 50-СИЗОдон №1- тергөө абагына которуу өтүнүчүнөн улам башталганы айтылды.
Эске салсак, ушул сыяктуу окуялар 2011-жылдын аягында, Жогорку Кеңештин төрагалыгынан Ахматбек Келдибековдун кетүүсүн талап кылуу башталганда орун алган болчу. Анда ачкачылык акциясы массалык мүнөзгө ээ болуп, 6 колония менен 3 тергөө изоляторунда 3 миңдей адамдын катышуусу менен өткөн. Аны Келдибековдун спикерликтен кетишине каршылык көрсөтүү катары баалагандардын катарында Жаза аткаруу кызматынын ошол кездеги төрагасы Шейшенбек Байзаков жана башкалар да болгон.
Ал күндөрү интернетке Жогорку Кеңештин депутаты Улан Чолпонбаевдин криминалдык авторитет Камчы Көлбаев менен Караколдо лыжа базадагы эс алууда түшкөн сүрөттөрү жайылып кеткен. Ахматбек Келдибеков да ушул лыжа базасында ошол күндөрү эс алганы, К.Көлбаев менен жолугушканы тууралуу маалыматтар ЖКнын трибунасынан айтылып, талкуу башталып, окуянын аягы Келдибековдун төрагалыктан кетиши менен жыйынтыкталган эле.
28-ноябрь күнү акыйкатчы Бакытбек Аманбаев Ахматбек Келдибеков менен жолугуп чыкканын айтып: «Ал окуя бир тараптуу чагылдырылып, мени каралоо иштери жүрүп жатат. Соттун чечими чыга элек жатып Келдибековду күнөөлүү кылып коюшту деп айтты»,- деди.

Эльвира Караева
politika@super.kg