20-кылымдагы техниканын өнүгүшү өндүрүштө адамдын күчүн жарым-жартылай алмаштырууга жетишти. Ал эми 21-кылымдагы заманбап тиричилик техникалары жалкоо келиндердин тилегин орундатууда. Мына ошондой керемет буюмдун бири мультиказан тууралуу маалыматка назарыңызды бурабыз.

ЭМНЕ БОЛГОН КАЗАН, ЫЯ?
«Мульти» англисчеден которгондо «көп» деген маанини берет. Аты айтып тургандай, бул идиш көп тамактын түрүн бышырууга ылайыкташкан жана автоматтык режимде иштейт. Шорподон тартып палоону да басып жибере турган бул казан тамакты ысытканга жана көп убакытка чейин ысык бойдон сактап турууга жарайт. Мындайча айтканда, өзү жалгыз көмөч казан, буу казан жана мештин кызматын аткарат. Баасы 3 миңден 20 миң сомго чейин турат.

ИШТӨӨ ПРИНЦИБИ
Бул казанда тамакты даярдоого бир же бир нече этаптан турган программа аркылуу тийиштүү температура, басым жана мөөнөт берилет. Тамак жасоодо ортодон дагы кошумча азык кошууга туура келсе, анда мөөнөтүн белгилеп буйрутма берип койсоңуз, ошол маалда казан ишин токтотуп, сизге белги берип турат. Кошо турган азыктарыңызды кошуп, тамакты аралаштырып, андан соң тамак даярдоону уланта бересиз.

КАМ КӨРҮҮ
Казандын ичиндеги тамак бышуучу идиши күйгүзбөөчү катмар менен капталган. Андыктан анын ичин тазалоодо катмарына зыян келтирбөөчү каражаттарды колдонуу зарыл. Айрыкча кислота жана идиш жуучу зымы бар щёткаларды пайдаланууга болбойт.
Капкагындагы буу чыгаруучу тешиктери буу менен кошо чыккан заттар топтолуп отуруп бүтөлүп калат. Өз убагында тазалап турууну унутпаңыз.

РЕЖИМДЕР
Мультиказандын жөнөкөйлөрүндө тамак даярдоо үчүн 4-5 программа бар болсо, жакшыларында 20дан ашат. Казандын түрүнө жараша 50дөн ашык режим бар.Алардын негизгилери төмөндө көрсөтүлгөн:
Кайнатуу. Бул режимде шорпо, ботко сыяктуу тамактарды жасаганга болот.
Макарон бышыруу. Мында макарон, пельмен, вареник, хинкал жана башка кайнак сууга бышырылуучу тамактардын баарын бышырууга болот.
Демдөө. Этти же жашылча- жемиштерди демдөөгө ылайыкталган режим.
Кактап бышыруу. Сууну аз талап кылган азык-түлүктөр бышырылат.
Күрүч/гречка. Аталган режим күрүч, гречка, буурчак, фасоль өңдүү даярдоодо сууну көп талап кылуучу ири дан эгиндерин бышырууга ылайыкталган.
Палоо. «Күрүч» жана «кактап бышыруу» режимдери бирге иштейт. Алгач жогорку температурадагы «кайноо» режими ишке киришет да, аягында 5-10 мүнөт «кактап, кууруп бышыруу» режими пайдаланылат.

КОШУМЧА РЕЖИМДЕР
1. Бууга бышыруу. Бул режимде айрым тамактарды даярдоого ылайыкталган торчо колдонулат. Ал идиштин ичине орнотулуп, котлет, жашылча-жемиштерди, эт, балык, жумуртканы бууга бышырууга багытталган.
2. Жылуу кармап туруу. Даяр болгон тамакты бир нече саатка чейин ысык бойдон сактап турат.
Эскертүү! Көпкө ысык кармап турууда эзилип кетпей турган азыктарды гана бул режимде узак убакытка кармап турууга болот.
3. Жылытуу. Муздап калган азык-түлүктү жылытуу үчүн 50-60 градустук температурадан ашпашы керек.
4. Узак мөөнөттүү даярдоо. Бул режимде керектүү азык-түлүктөрдү бир убакта салып койсоңуз, сиз каалаган учурда тамак даяр болуп калат.

КООПСУЗДУКТУ ДА УНУТПАҢЫЗ

• Мультиказанды суусу бар идиштердин үстүнө, жанына коюуга болбойт.
• Түбүнөн тартып капкагына чейин ысыткычтар бар болгондуктан, анын тегерегине башка буюмдарды 15 сантиметрден жакын жолотпош керек.
• Буу чыгуучу тешигинин бүтөлүп калуусуна жол бербеңиз. Жарылууга алып келет.
• Өтө чоң көлөмдөгү азык-түлүктөрдү, фольгадан жасалган металл пакеттерди же идиштерди салса аппарат күйүп кетет.
• Көбүгү ашып-ташый турган азык-түлүктү бышырууга болбойт.

Кубаныч Сыдыков
kenesh@super.kg