• 11-мартта Экономика министрлигинин Банкрот иштери боюнча департаментинин директору Болсунбек Казаков «КРИСТАЛЛ» ишканасы банкрот болуп, 10-апрелде Таш-Көмүрдөгү кремний чыгаруучу завод 4,6 миллион доллардан турган старттык баа менен аукционго коюларын билдирди.
• Улуттук статистика комитети чет элдик ИНВЕСТИЦИЯНЫН АГЫМЫ 2012-жылга караганда 2013-жылы 1,7 эсеге жогорулаганын маалымдады. Негизги инвестициялык каражаттар Кытай, Канада, Улуу Британия жана Орусия өлкөлөрүнөн келген.
• Кыргызстан мунай сатуучулар ассоциациясынын президенти Медетбек Керимкулов 8-марттан тартып КҮЙҮҮЧҮ МАЙДЫН баасы 60 тыйындан 1 сомго чейин жогорулагандыгын белгиледи.
  
• Саламаттыкты сактоо министрлигинин маалыматына ылайык, өлкөдө жылына 6 миңге жакын адам КУРГАК УЧУК оорусуна чалдыгат.
• Мусулмандар дин башкармалыгынын АЖЫЛЫК-УМРА бөлүмүнүн башчылыгына сынак жарыяланды.
• Жогорку Кеңештин вице-спикери Төрөбай Зулпукаров 12-мартта Бишкек шаарында ГЕЙЛЕРГЕ КАРШЫ акцияга чыккан «Калыс» кыймылынын лидери Жеңиш Молдокматовду кабыл алып, баарлашууда өлкөдөгү гейлердин саны 10 миңге чукулдап калганы айтылды.
• Бишкек мэриясы борборду жашылдандырууга, ГҮЛДӨРДҮ ӨСТҮРҮП, кароого 3 миллион сомдон ашуун каражат бөлөт.
• ЧИНАРА ЭСЕНГУЛ Стратегиялык изилдөөлөр улуттук институтунун директорунун орун басары болуп дайындалды.
  
• Кыргызстан КМШнын ичинде көз карандысыздыкка жеткен мезгилден бери ПРЕМЬЕР-МИНИСТРЛЕРДИ эң көп алмаштырган өлкө болду. Соңку 23 жыл ичинде өлкөдө 25 өкмөт башчы бийликке келип кеткен.
• САРУУ айылынын тургундары 12-мартта өтчү курултайын 22-23-март күндөрүнө жылдырышты.
• КСДП фракциясынан Жогорку Кеңештин депутаты ИСМАИЛ ИСАКОВ Кыргызстандан тышкары жакта кызматтык адамдардын жана алардын туугандарынын активдерге ээ болуусуна тыюу салуучу мыйзам долбоорду демилгелеп чыкты.
• Парламенттин спикери Асылбек Жээнбеков: «Өлкөнүн БАЖЫ БИРИМДИГИНЕ кирип-кирбөөсү боюнча принципиалдык чечимди Жогорку Кеңеш кабыл алат»,- деп билдирди.
  
  

Эльвира Караева
Ширин Турдакунова
politika@super.kg