• 
• Жыл башынан бери өлкөдө  28 өспүрүм өз ӨМҮРҮН КЫЙГАН. Бул тууралуу ички иштер министри Абдылда Суранчиев маалымдады. Суицидге кадам таштагандардын 15и эркек, 13ү кыз.
• «ДОРДОЙ» соода комплексинин профсоюзунун төрайымы Дамира Дөөлөталиеванын айтымында, Казакстан тарап чек арадан кыргызстандык ишкерлердин жүгүн өткөрүүнү токтотту.
• Саламаттыкты сактоо министрлиги «өлкөдө БРОНХИАЛДЫК АСТМА менен ооруган 10 миң адам бар» деген маалымат таратты.
• 2013-жылы «КЫРГЫЗАЛТЫН» ААКсынын таза кирешеси 405 миллион 771 миң сомду түздү. Бул көрсөткүч 2012-жылга салыштырмалуу 2 эсеге аздык кылат.
• Билим берүү министрлиги АКЫРКЫ КОҢГУРОО салтанаты быйыл 24-майда саат 9:00дө башталарын билдирди.
• Социалдык өнүктүрүү министри Кудайберген Базарбаевдин айтымында, азыркы кезде Кыргызстанда 2500 БАЛА ата-эне камкордугунан сыртта калган.
• Бишкекте 19-майдан тарта ЖЫЛУУ СУУ бир айга өчүрүлөт.
• Быйыл АЖЫЛЫК ЗЫЯРАТ үчүн Сауд Арабия бийлиги Кыргызстанга 3 миң 685 орун бөлүп берди. Ажылык сапарга баруунун акысы 2 миң 400 доллардын тегерегин түзүүдө.
• АДИЛЕТ МИНИСТРЛИГИ Кыргызстанда адамдын аброюн маалымат каражаттары аркылуу басмырлаган, шылдыңдаган, кемсинтүүгө жол бергендерге каршы административдик айыпка тартуу тууралуу мыйзам долбоорлоруна өзгөртүүлөрдү киргизүү сунушун билдирди. 
• БООМ КАПЧЫГАЙЫНДА медициналык жардам көрсөтүүчү жай ачылат. Анын курулушу 3 апта аралыгында аяктап, андагы кызматкерлер үчүн «Тез жардам» унаасы берилет.
• УЛУТТАШТЫРЫЛГАН объектилерди башкаруудан улам өлкө казынасына 4 миллиард 846 миллион сомдон ашуун каражат түшкөндүгү тууралуу Мамлекеттик мүлктү башкаруу фонду билдирди.
• Толкунбек Абдыгулов УЛУТТУК БАНКТЫН төрагасынын милдетин аткаруучу болуп дайындалды. Ага чейин бул кызматты ээлеген Зина Асанкожоева апрель айынын орто ченинде өз эрки менен жумуштан бошогон.
• Байланыш боюнча мамлекеттик агенттиктин директору Чыңгыз Бекташовдун айтымында, 2016-жылы Кыргызстандын бүткүл аймагы УЮЛДУК БАЙЛАНЫШ менен камсыз болот. Азыркы тапта өлкө ичинде эл жыш отурукташкан 128 аймакта уюлдук байланыш жок.

Эльвира Караева,
Темирбек Матаев
politika@super.kg