Жогорку Сот 14-май күнү Камчы Көлбаевдин ишин карап чыгып, 2013-жылдын 24-декабрында Бишкек шаардык соту чыгарган өкүмдү күчүндө калтырды. Кримтөбөл Камчы Көлбаевге карата «опузалоо», «адам уурдоо», «тоноо», «кылмыштуу топту уюштуруу» беренелери боюнча кылмыш иши козголгон эле. Бирок күбөлөрдүн көпчүлүгү сот учурунда берген көрсөтмөлөрүнөн баш тарткандыгына байланыштуу коюлган беренелердин айрымдары боюнча кримтөбөл акталган.
Ошентип, өткөн жылы Биринчи Май райондук соту Көлбаевди 5 жыл 6 айга эркинен ажыраткан. Бирок К.Көлбаевдин адвокаты арыз менен Бишкек шаардык сотуна кайрылып, бул инстанция жаза мөөнөтүн 3 жылга чейин кыскарткан. Жыйынтыгында тергөө изоляторунда өткөргөн 1 күнү 2 күнгө эсептелинип, Камчы Көлбаев абактан 1 айдан кийин чыгып калат дешүүдө.
«Мыйзамдагы ууру» атыккан жана АКШнын дүйнөдөгү баңги барондорунун тизмесине кирген Камчы Көлбаев 2012-жылдын декабрь айында Дубайдан Бишкекке келип, укук коргоо органдарынын колуна түшүп берген болчу.

Темирбек Матаев
politika@super.kg