Жогорку Кеңештин профилдик комитети 16-июнда «Мөңгүлөр тууралуу» мыйзам долбооруна байланыштуу макулдашуу тобун түзүү сунушун колдоду. 30-май күнү президент Алмазбек Атамбаев аталган мыйзам долбоорго «бюджеттин киреше бөлүгүн кыскартууга алып келет» деген негиз менен кол койбой, кайрадан парламенттин кароосуна жөнөткөн болчу.
«Макулдашуу тобунун мүчөлөрү 6-беренени алып салгыла деп чыгышса керек. Анда мөңгүлөрдү талкалоого алып келген иштерге тыюу салынат деп айтылат. Бирок мен бул берененин калышын жактайм, ал мыйзам долбоордун негизи, ансыз долбоордун өзү керексиз»,- деп билдирди мыйзам долбоордун демилгечилеринин бири депутат Эркингүл Иманкожоева. Өкмөт «бул документ геология менен алтын казып алуудагы бардык иштерди, анын ичинде «Кумтөрдү» да токтотот» деген аргументти карманууда. «Кумтөр» кенинде жайгашкан Давыдов мөңгүсүндө башында 700 миллион куб суу бар болчу, азыр 300 миллион кубга да жетпейт. Ачык эле моюнга алуу зарыл, биз бул мөңгүнү колдон чыгарып ийдик. Мыйзамдын демилгечилери сунуштагандай, азыр алтынды жер астынан казып алууга өтө албайбыз, анткени топурак кыртышы бошоңдоп калган, көчкү жүрүп кетүү тобокели бар»,- деди биринчи вице-премьер Тайырбек Сарпашев.

Эльвира Караева
politika@super.kg