Кыргыз-тажик чек арасында өткөн аптада катталган акыркы жаңжалдан кийин тажик тарап Баткен облусундагы Ак-Сай – Көк-Таш – Тамдык – Кишемиш унаа жолунун курулушун токтотууну суранды. Эскерте кетсек, 10-июлда кыргыз-тажик чек арачылары атышып, андан улам тажик тараптан 2 адам каза таап, 7 адам жаракат алган. Ошондой эле кыргыз тарабынан жаракат алган бир чек арачынын абалы канааттандырарлык деп билдирилген.
Андан көп өтпөй Тажикстандын жерге жайгаштыруу жана геодезия комитетинин башчысы Махмадтоир Зокиров "кыргыз-тажик чек арасы такталмайынча жаңы жол куруу боюнча сөз да болбошу керек" деп айтып чыкты. Ал эми Кыргызстандын вице-премьери Абдырахман Маматалиев “Тажикстан чек ара боюнча сүйлөшүүлөрдө 1924-1926-жылдары бекитилген карталарга жана документке таянууда. Коңшу өлкө бизге "ушул документти кабыл алгыла" деп жатат. Ал учурда Тажикстан Өзбекстандын курамында эле. Ал эми биз кийин чыккан 1957-1959-жылдарга тиешелүү документтерге карата сүйлөшүүлөрдү жүргүзүп жатабыз. Ал кагаздарга ылайык, такталбаган деп айтылган жерлер биздики” деди.

Эльвира Караева,
Наргиза Бекжанова
politika@super.kg