• Отун-энергетикалык комплекс боюнча департаменттин директору Нурбек Элебаевдин айтымында, Казакстандан импорттоло турган электр энергиясынын 1 киловатт-саатын Кыргызстан болжолдуу түрдө 5 СОМ 13 ТЫЙЫНДАН сатып алат.
• БАКТЫБЕК ЖУСУБАЛИЕВ ички иштер министринин биринчи орун басарлыгынан бошотулду. Аталган кызмат ордуна ИИМдин Кадрлар башкы башкармалыгын жетектеп келген Нурбай Касымбаев дайындалды.
• ЭТНИКАЛЫК КЫРГЫЗДАРДЫН 300 үй-бүлөсүнө Сокулук районундагы Жаңы-Пахта айыл өкмөтүнөн там салуу үчүн жер тилкелери бөлүнүп берилди.
  Экс-президент Курманбек Бакиевдин агасы Жусуп Бакиевдин уулу САНЖАР БАКИЕВ жаза өтөө мөөнөтүн аяктагандыгына байланыштуу эркиндикке чыкты. Ал «2010-жылдын май айында Жалал-Абадда баш аламандык уюштурган, мыйзамсыз курал сактаган» деп соттолгон болчу.
• 14-ноябрда Ысык-Көлдүн КАЖЫ-САЙ жергесинде болуп өткөн жер титирөөдөн улам тартылган зыяндын суммасы 100 миллион сомдун тегерегин түзүп, 1400гө жакын турак жайлар залал тарткан.
• Башкы прокуратура “Вечерний Бишкек” гезитинин ээси “РУБИКОН” фирмасынын 48 пайыздык акциясы арестке алынганын билдирди. Мындай чечим Аскар Акаевдин күйөө баласы, ишкер Адиль Тойгонбаевге карата козголгон кылмыш иштерине байланыштуу экендиги айтылды.
• КАРАКОЛ шаары КМШ өлкөлөрүндөгү тоо лыжа курортторунун эс алуу баасы боюнча биринчи орунду алды. Рейтинг жер кезерлерге арналган Орусиянын белгилүү порталы тарабынан түзүлгөн.
• Ош шаардык кеңешинин депутаты Талант Капаров орусиялык гранттын эсебинен курулушу бүтмөк болгон эстакадалык көпүрөгө Орусиянын президенти ВЛАДИМИР ПУТИНДИН ысымын ыйгарууну сунуштады.
• “Өлкөдө ТУКУМСУЗ адамдардын 50 пайыздан көбүрөөгүн эркектер түзөт. Советтик мезгилде бул көрсөткүч 20-25 пайыздан турчу”,- деп билдирди врач-уролог Бакы Асанбаев.
• Жогорку Кеӊештин депутаты, “Республика” фракциясынын лидери Максат Сабировго атасы Сабыр уулу Эсендин дүйнөдөн кайтканына байланыштуу тереӊ кайгыруу менен көӊүл айтабыз.“Супер-Инфо” гезитинин эмгек жамааты

Наргиза Бекжанова
Мирлан Өмүралиев
politika@super.kg