• Кыргызстанда доллардын курсу кескин көтөрүлдү. Тактап айтканда, Бишкекте 25-мартта акча алмаштыруучу жайларда 1 ДОЛЛАР 65 сомдон сатылды.
• АЙБЕРМЕТ КУТУЕВА юстиция министринин орун басары болуп дайындалды. 32 жаштагы бул айым буга чейин Чүй-Бишкек Юстиция башкармалыгын жетектеп келген.
• 2015-жылы республикалык бюджеттин эсебинен 138,7 ЧАКЫРЫМ ЖОЛГО асфальт төшөө пландалууда. Бул тууралуу Транспорт жана коммуникация министрлигинен билдиришти. Быйыл 2 көпүрө курулуп, 9 көпүрө оӊдоодон өткөрүлмөкчү.
• Кыргыз тилин өнүктүрүү боюнча 2020-жылга мерчемделген мамлекеттик программаны ишке ашырууга 493 МИЛЛИОН 600 МИӊ сом жумшалат. Бул тууралуу каржы министринин орун басары Арзыбек Кожошев билдирди. Аталган программаны ишке ашырууга быйыл 243 миллион сом бөлүнөт.
• Издөөдө жүргөн Ош шаардык прокуратурасынын мурунку кызматкери КАНЖАР КАДЫРАЛИЕВ Башкы прокуратурага өзү келгени маалым болду. Бул тууралуу укук коргоо органдарындагы өздүк булактарыбыз маалымдашты. Эске салсак, буга чейин Башкы прокуратура Кадыралиевге карата «бейбаштык», «өзүм билемдик» жана «зомбулук көрсөтүү менен талап кылуу» беренелери боюнча кылмыш ишин козгоп, ээлеп турган кызматынан бошоткон эле.
• Алмазбек Асанбаев эмгек, миграция жана жаштар министринин ОРУН БАСАРЫ болуп дайындалды. Тийиштүү жарлыкка 17-мартта премьер-министр Жоомарт Оторбаев кол койгон.
• Акыркы 5 жыл ичинде өлкөдө ПЕНСИЯНЫН орточо көлөмү 164,3 пайызга көбөйгөн. Башкача айтканда, 2800 сомдон 4600 сомго чейин жогорулаган.
• 1990-жылдан 2013-жылга чейин КУРГАК УЧУКТАН болгон өлүмдөр 45 пайызга төмөндөдү. Бул тууралуу вице-премьер министр Дамира Ниязалиева билдирди.
• Өлкө аймагында 20-марттан 22-мартка чейин 61 жол кырсыгы катталып, 7 АДАМ КАЗА ТААП, 87 адам ар түрдүү жаракаттарды алды. Бул тууралуу Ички иштер министрлигинин Жол-кайгуул кызматынан билдиришти.
• Сузак районунун Ырыс айылында 240 орундуу ЖАӊЫ МЕКТЕП ачылды. Мектептин курулуш иштери 2008-жылы башталган. 240 окуучуга ылайыкташкан мектептин жалпы сметалык баасы 40 миллион сомду түзгөн. Буга чейин окуучулар 1932-жылы салынган эски мектепте окуп келишкен.
• Орусиянын Федералдык миграция кызматынын маалыматына ылайык, 2014-жылдын 4-декабрында Орусияда расмий катталган КЫРГЫЗСТАНДЫКТАРДЫН саны 540 миӊ болсо, үстүбүздөгү жылдын 5-мартында бул көрсөткүч 523 миӊди түздү.

Мирлан Өмүралиев
politika@super.kg