• 2015-жылдын 1-кварталында өлкө аймагында 1284 жол кырсыгы катталып, 194 адам каза тапкан. Бул тууралуу Жол-кайгуул кызматынан билдиришти.
• Канжар Кадыралиев 10-апрелде Бишкек шаардык сотунун чечиминин негизинде үй камагына чыгарылганын Башкы прокуратура ырастады. Ошол эле күнү мамлекеттик айыптоочу шаардык соттун чечимин жокко чыгаруу боюнча Жогорку Сотко сунуш киргизген.
• 2014-2015-жылдары 14 651 кыргыз студенти чет жакка окууга кеткен. Бул тууралуу Билим берүү жана илим министрлигинин статс-катчысы Калыс Шадыханов маалымдады. «Эми алардын мекенине келип иштеши күмөн. Буга эң башкы себеп – өлкөдөгү айлык акынын аздыгы» дейт ал.
• Жыл башынан бери өлкө боюнча 57 өзгөчө кырдаал катталып, 9 адам каза болгон. Бул тууралуу өзгөчө кырдаалдар министри Кубатбек Боронов билдирди.
• Эсептөө палатасынын төрайымы Эльмира Ибраимованын айтымында, аудит иштеринин жыйынтыгына ылайык, Ош жана Жалал-Абад шаарларын калыбына келтирүү боюнча мамдирекцияда 2 миллион
  84 миң сомдук каражатты уурдоо аныкталды.
• 1, 5, 9-май күндөрү кыргызстандыктар эс алышат. Бул тууралуу Эмгек, миграция жана жаштар министрлиги маалымдады. Бул жылы 9-май дем алыш күнүнө туура келип калгандыктан, 11-май да эс алуу күнү болот.
• 2015-жылдын 1-январына карата Кыргызстан калкынын 72 пайызы интернет менен камтылган, ал эми интернет колдонуучулардын саны 4 миллион 87 миң абоненттен ашкан. Бул тууралуу Байланыш агенттиги маалым кылды.
• Интеллектуалдык менчик жана инновациялар кызматынын төрагасынын орун басары Зина Исабаеванын айтымында, өлкөдөгү оюнчуктардын 90 пайызы жаш балдардын ден соолугуна коркунуч жаратат.

Мирлан Өмүралиев
politika@super.kg