Жакында гана каржы министри Ольга Лаврова жылкы теппей, жылан чакпай өз эрки менен отставкага кеткен болчу. 21-апрелде Транспорт жана коммуникация министрлигин 2011-жылдан бери жетектеп, өкмөт башчыдан экөө алмашса да «креслосунан кыйшайбай» келе жаткан Калыкбек Султанов отставкага кетүүгө арыз жазды. Калыкбек мырза эмнеликтен мындай кадамга барганын түшүндүргөн жок. Жоомарт Оторбаевдин айтымында, министрдин отставкага кетүүсүнө чет жерде операция жасатууга муктаж экендиги себеп болгон.
Парламентте министрлер кабинетин отставкага кетирүү жөнүндө сөз болуп жатканда Калыкбек мырзанын ээлеген ордунан баш тартканы ар кандай божомолдорду жаратты. Айрымдар бул кадамды күзүндө өтчү парламенттик шайлоого даярдык катары баалашууда. "Текебаев-Самаков тирешинен улам Самаковдун кудасы болгон Султанов кызматын тапшырды" дегендер да болду. Белгилей кетчү жагдай, Султанов Жоомарт Оторбаевдин өкмөтүндө акыркы 8 ай ичинде отставкага кеткен тогузунчу министр болуп калды. Бул окуядан эки күн өткөн соң өкмөт башчы да отставкага кетти.

Мирлан Өмүралиев
politika@super.kg