•  Бишкек жана Ош шаарларында ЭКСТРЕМИСТТЕР акция даярдап жатат деп таратылган маалыматтан улам кармалган 3 адам 3 жылга чейин эркинен ажыратылышы мүмкүн. Бул тууралуу ИИМ билдирди. 
•  Ар-намыс фракциясынын лидери ФЕЛИКС КУЛОВ: «Мен сөзсүз күзүндө өтүүчү парламенттик шайлоого талапкер катары катышам. Биздин партия шайлоонун алдында башка партиялар менен да бирикпейт»,- деди.
•  Өлкөдө 100гө жакын минералдык суу чыккан БУЛАК бар. Учурда аны ЕАЭСтин өлкөлөрүнө экспорттоо мүмкүнчүлүктөрү каралып жатат. 
•  Билим берүү жана илим министри Эльвира Сариеванын айтымында, 2015-жылдын 1-сентябрынан тартып окуучулар БИРДИКТҮҮ МЕКТЕП ФОРМАСЫН кийүүгө милдеттүү болот. 
•  Улуттук статистика комитетинин маалыматы боюнча, өлкөдө ЫМЫРКАЙ эӊ аз Бишкек шаарында, эӊ көп Нарын, Талас жана Баткен облустарында төрөлөт. Бул көрсөткүч бир аялга туура келген наристелердин санына жараша эсептелген. 
•  «КЫРГЫЗ ИЗИ» деген долбоор старт алганы турат, анда жаш активисттер жакынкы 5-6 жылдын ичинде 5 материкти жөө кыдырып чыгышмакчы. 
•  Кыргызстанда КАЛКТЫН САНЫ 2015-жылдын 1-мартына карата 5 миллион 912 миӊ адамды түздү. Бул тууралуу 13-майда Эмгек, миграция жана жаштар министрлиги билдирди.
•  ИИМдин 10-башкы башкармалыгынын башчысы Рафик Мамбеталиевдин айтымында, СИРИЯДА болуп жаткан жарандык согушка Кыргызстандан 352 жаран кетип, ичинен 31и каза болуп, бешөө мекенине кайтып келген.
•  20-майдан тарта АЙДООЧУЛУК КҮБӨЛҮКТӨР 10 жылдык убакытка бериле баштайт. Мамлекеттик каттоо кызматы билдиргендей, айдоочу жарактуу мөөнөтү көрсөтүлбөгөн күбөлүгүн алмаштыргысы келсе, тиешелүү арыз менен кайрылып, эч кандай сынаксыз ала алат. 
•  Бишкекте 1-апрелден баштап жылытуу жана ысык сууга болгон ТАРИФ жогорулады. Калк үчүн жылытуу энергиясынын 1 гигакалориясы 917 сомдон 1134 сомго, 1 метр куб суу 48 сомдон 64 сомго көтөрүлдү. 
•  Президент АЛМАЗБЕК АТАМБАЕВ «Жусуп Баласагындын 1000 жылдыгы жөнүндө» жарлыкка кол койду. 1069-1070-жылдары Жусуп Баласагын жазган түрк тилиндеги «Кутадгу билиг» («Куттуу билим») эмгеги дүйнөнүн көп тилдерине которулган.
•  Борбор шаардагы КОРОО ШЫПЫРУУЧУЛАРДЫН маянасы совет доорунан бери өзгөрө элек. Алар 100 чарчы метр үчүн 2 сом 85 тыйын алышып, айына орточо 7 миӊ сом колдоруна берилет.

Мирлан Өмүралиев
politika@super.kg