Акыйкатчы Бактыбек Аманбаев менен Жогорку Кеӊештин ортосун кара мышык аралагандай. Дегенибиз 10-июндагы жыйынында Кыргыз Республикасынын Акыйкатчысынын 2014-жыл боюнча баяндамасы уктурулуп, эл өкүлдөрү аны жактырышпады. Талкууда көпчүлүк депутаттар бул баяндамага нааразы болуп жатышты. Алардын айтымында, акыйкатчынын отчётунда өспүрүмдөрдү зордук-зомбулуктан куткаруу боюнча эч кандай сунуштар каралган эмес. Сындоочулардын катарында «бизди коргободуӊ» деп таарынгандар да болду.
Жыйынтыгында акыйкатчынын баяндамасын жактырбоого 69 депутат "макул", ал эми 25 депутат "каршы" добуш берди.
Белгилей кетүүчү жагдай, Бактыбек Аманбаев отчёт берүү күнүн 5 ирет алмаштырып, депутаттардын сынына кабылган эле. Жыйын жүрүшүндө ал: «Мага жаман иштеп жаткандыгым тууралуу далилдерди көрсөткүлө. Далил бар болсо, кызматтан кетүүгө даярмын»,- деп туталанды. Кыргыз Республикасынын "Акыйкатчы жөнүндө" мыйзамына ылайык, эгер Жогорку Кеӊеш акыйкатчынын жылдык баяндамасына "канааттандырарлык эмес" деген баа берсе, акыйкатчынын ыйгарым укуктары мөөнөтүнөн мурда токтотулушу керек. Башкача айтканда, Жогорку Кеӊеште атайын комиссия түзүлүп, акыйкатчыны кызматта калтыруу же калтырбоо чечимин чыгарат.

Мирлан Өмүралиев
politika@super.kg