Учурда айрымдар жаштыкты узартабыз деп суу, көк чай ичүүнү адатка айлантып алышкан. Эл ичиндеги андай адаттардын кайсынысы туура, организмге зыяны жокпу деген суроолорго Бишкектеги №19-эмкананын врач-терапевти Үмүт Саипова жооп берет.

ЛИМОН КОШУЛГАН СУУ АРЫКТАТАБЫ?
Элдин түшүнүгүндө
Эртеӊ менен ачкарын суу же сууга бал менен лимон кошуп ичүү кажет. Мындан ичегилер тазаланып, адам арыктайт жана жаш көрүнөт.
Врач эмне дейт?
Күн сайын ачкарын сууга бал менен лимон кошуп ичүүгө келсек, лимон организмди A, E, B, C витаминдери менен камсыз кылып, бал иммунитетти көтөрүүгө жардам берет. Бирок ачка жүрбөй, артынан 30 мүнөт же 1 саат өткөн соӊ эртеӊ мененки тамакты ичүүнү унутпоо зарыл. Дамамат ачка жүрүүдөн гастрит жана ашказан-ичегинин жарасы пайда болуусу ыктымал. Себеби ачка жүргөндө ашказанда бөлүнүп чыккан туз кычкылы ашказандын былжырын оюп жеп жиберет. Тамак барбагандан ичегилер жакшы иштебей ич катат. Арыктайм дегендер тамак алдында суу ичип алса, ашказанга тамак аз батары белгилүү.

КӨК ЧАЙ РАКТЫН АЛДЫН АЛАБЫ?

Элдин түшүнүгүндө
Ачкарын көк чай ичүү рактын алдын алат, кандагы холестеринди, кантты азайтат, жаштыкты узартат.

Врач эмне дейт?
Көк чайдын өттү айдоочу, ашказан-ичегини тазалоочу касиети бар. Өттө таштын жаралуусунун алдын алат. Ушулардан улам кандайдыр бир деӊгээлде рактын жана карылыктын алдын алат десек болот. Бирок кандагы канттын, холестериндин деӊгээлин азайтат деген түшүнүк туура эмес. Көк чайдын артынан жарым сааттан соӊ шам-шум этүү кажет.

ЗАЙТУН МАЙЫНАН ӨӉ НУРДАНАБЫ?

Элдин түшүнүгүндө
Эртеӊ менен дайыма ачкарын зайтун майын ичсе организмдеги шлактар чыгып, тери жашарат, бет нурданат. Ошондой эле өттөгү кум, майда таштар чыгып, ичтин өнөкөт катуусу калат.

Врач эмне дейт?
Айтылгандар элдик медицинада колдонулушу мүмкүн. Бирок салттуу медицинада зайтун майынын өттөгү кумду, майда ташты чыгарары, ичтин өнөкөт катуусун калтырары далилденген эмес. Бирок тамак-ашка дайыма колдонуп жүрсө, териге жакшы таасир этип, өӊ жакшырары белгилүү.

Канымжан Усупбекова
kenesh@super.kg