Келерки жылы АКШда өтчү президент­тик шайлоодо негизги фаворит болуп турган Хиллари Клинтондун мамлекеттик катчы болуп тургандагы кат алышуулары ачыкка чыкты. Бул каттарда Кыргызстандагы 2010-жылдагы абал да кеӊири талкууланган.
Хиллари айым 2010-жылы Нью-Йорктогу Адам укуктары боюнча эл аралык лиганын башчысы Скотт Хортон менен биздин өлкө тууралуу жазышкан. Кыргызстанга келип кеткен Скотт Хортон өз каттарында 2010-жылдагы Кыргызстандагы бир катар кырдаалдар тууралуу билдирген. Анда Убактылуу өкмөттүн мүчөлөрү болгон Атамбаев менен Бекназаров өз ара кагылышып жатканы, ошондой эле Бекназаровдун Сариев менен мамилеси да жакшы эмес экенин жазат. Буга катар Июнь окуясында улуттар аралык кагылышууга Бакиевдин тиешеси болушу мүмкүн экендигин айтат. Скотт Хортон АКШнын Кыргызстандагы авиабазасына тиешелүү маселеде Убактылуу өкмөт мүчөлөрүндө ойлор кайчы болуп жатканын маалымдайт. Алсак, Роза Отунбаева баштаган топ базаны калтырууга макул, бирок Кыргызстанга келтирүүчү экономикалык пайдасы ачык көрсөтүлүүсү керек деген пикирде экендиктерин, Бекназаров баштаган топ популисттик ойдо жана Атамбаевде да АКШнын авиабазасына байланыштуу популисттик ойлор бардыгы, бирок Бекназаровго караганда популизмге алдырбай турганы айтылган. Убактылуу өкмөттүн башчысы Роза Отунбаева бул маселени чече алса керек деген ойлорун билдирген.

Мирлан Өмүралиев
politika@super.kg