Бай+кедей жашоосу. Байдын өзүнчө, кедейдин өзүнчө түмөн түйшүгү бар. Биринин жашоо-турмушу экинчисине маӊыздуу, кызыктуу көрүнгөн каармандардын башын бириктирген «1+1» (баштапкы аталышы «Кол тийбестер» – «Неприкасаемые») тасмасы көрөрманды кайдигер калтырбайт деп ишенем. Тасма жашоону, тегерегиӊдеги адамдарды сүйө билүүгө, аларга ишенүүгө, ар бир көз ирмемди баалоого түрткү бергендей элес калтырат.

Тарткан өлкө – Франция
Чыккан жылы – 2011-жыл
Жанры – Трагикомедия
Режиссёр-сценаристтер – Оливье Накаш, Эрик Толедано
Композитору – Людовико Эйнауди
Башкы ролдордо – Франсуа Клюзе, Омар Си
Сыйлыктары – «Алтын жылдыз» , «Сезар» жана башка
Тартууга кеткен каражат – 11 500 000 АКШ доллары
Сатыктан түшкөн каражат – 426 588 510 АКШ доллары

ФИЛИПП ЖАНА ДРИСС ДОСТУГУ
Филипп – байлыгы ашып-ташкан, бирок ден соолугунан ажыраган ак сөөк адам. Эс алып жүргөндө кырсык тооруп парапландан кулап, өмүр бою майыптардын арабасында отурууга аргасыз болгон. Аялы каза болуп, заӊгыраган чоӊ үйдө 16 жаштагы кызы жана үй кызматчысы үчөө жашайт.
Ал эми Дрисс – баӊгизат колдонгон, шаан-шөкөттү сүйгөн, күндөп-түндөп үйүнө токтобогон тентек жигит. Бири-бирине карама-каршы келген бул эки адамды тагдыр кандайча тааныштырат?
Оорулуу адам чыргоо болуп калат дегендей, Филипптин «каприздерине» бардык эле жардамчылары чыдай бербейт. Анткен менен моюндан ылдый бөлүгү кыймылга келбеген анын жанында күнү-түнү карап, кам көрчү адам болушу шарт эле. Ал эми Дрисс жумушсуздарга берилчү жөлөк пулду алыш үчүн «жумушка кабыл алынган жок» деген маалым кат алышы керек болчу. Бирок анын «мени да кабыл албайт» деген оюн таш каап, Филипп кара терилүү Дриссти жардамчы кылып жумушка алат. Жаӊы жардамчы оорулуунун жашоосун 180 градуска өзгөртүп, баш аламандыкты жаратат. «Эл эмне дейт? Маданияттуу адам мындай кылбашы керек» деген принциптердин быт-чыты чыгып, шайыр Дрисстин жардамы менен Филипп марихуана чегип көрөт, спирт ичимдигин ичет, сөгүнүп-сагынганды үйрөнөт. Интернеттен тапкан сүйүктүүсү менен жолугат, акыры жалгыз эместигин, оорулуу адамды да сүйгөндөр, баалагандар болорун түшүнөт.
Өз кезегинде Филипптин жашоосунан таасирленип Дрисс да шайкелеӊ досторунан кол үзүп, уурулугун таштап, апасына, ини-карындашына жардам берген камкор адамга айланат. Тасманын аягында Филипп экинчи ирет үйлөнүп, эки кыздуу болсо, ал эми Дрисс ишкерлик менен алектенип, үй-бүлө күтүп, үч баланын атасы экени жана экөө азыркыга чейин байланышты үзбөй дос болуп келе жатканы айтылат.

КЫЗЫКТУУ ФАКТЫЛАР
1. Тасманын сюжети чыныгы жашоодон алынган. Француз аристократы Филипп Поццо ди Борго 1993-жылы кырсыктан улам майып болуп калат. Анын мүӊкүрөп отуруп калбай жашоосун улантып кетүүсүнө жардамчысы, араб улутундагы Абдель Селлунун салымы чоӊ.
2. Бул окуянын негизинде 2001-жылы «Экинчи мүмкүнчүлүк» («Второй шанс») чыгармасы китеп болуп басылып чыгып, анын негизинде 2004-жылы даректүү фильм
тартылган.
3. Тасманын режиссёрлору жана сценаристтери Оливье Накаш жана Эрик Толедано тасманы тартардан мурун Филипп Поццо менен жолугушкан. «Филипптин ар бир кадрды тартууда чоӊ салымы бар» дешет кино жаратуучулар.
4. Баш каармандын ролун жараткан Франсуа Клюзе да тартуу иштери башталарда Филипптин мастер-классынан өтүп, анын сүйлөө манерасы, жүрүм-турумуна чейин үйрөнгөн.
5. Омар Си сценарий жазылгычакты эле Дрисстин ролун ойноого чакырылган жалгыз актёр. Ал бул тасмага тартылуу үчүн 5 килограммга арыктаган.

КИНОДОГУ ЭСТЕ КАЛГАН ЦИТАТАЛАР:

Филипп: – Сиз Шуберт, Шопен, Берлиозду тааныйсызбы?
Дрисс: – Берлиоз дейсизби? Сиз да Берлиоз менен таанышсызбы?
Филипп: – Мен ал боюнча көп изилдегем, адисмин десем болот.
Дрисс: – Коюӊузчу, ай, кимисин тааныйсыз, кайсы үйдөгү?
Филипп: – Кандайча кайсы үйдөгү? Жок, угуп турсаӊыз, азыр Парижде Берлиоз деген район бар. Бирок 19-кылымда ал композитор, жазуучу, сынчы болчу...

Асыл Орозбекова
star@super.kg