Маданият, маалымат жана туризм министрлигинин алдындагы Туризм департаментинин башчысынын орун басары Михаил Ким визасыз каттам маселеси боюнча маалымат каражаттарынын бирине жооп берип жатып «кооптуу болуп жаткандыктан Түркия менен Кыргызстандын ортосундагы визасыз каттамды жок дегенде жарым жылга токтотуу керек» деген ойду айтты. Орусия менен Түркиянын ортосундагы мамиле чыӊалып турган чакта эгемен Кыргызстандын чиновнигинин минтип айтканы, албетте, коомчулуктун көӊүлүнүн сыртында калган жок. Жогорку Кеӊештин депутаты Дастан Жумабеков министр Алтынбек Максүтовго кайрылып: «Элде ар кандай таасир жараткан билдирүүнү эмнеге айтат? Бизде өкмөт, өкмөт башчы деген барбы?»- деди. Министр Михаил Кимге карата чара көрүлөт деп кутулду.
Эске салсак, Кыргызстан 45 өлкөгө визасыз каттам тартибин киргизген. Жакынкы күндөрдөн бери андай каттамдарды жоюу боюнча Жогорку Кеӊеште сөз болууда. Бирок визасыз режимди жоюуну көздөгөндөр коопсуздук үчүн эмес, виза берүүдөн түшүүчү каражатты кайра калыбына келтирүү үчүн жанталашып жатышат. Бул маселени көтөрүп чыккан эл өкүлү Алмаз Баатырбековдун айтымында, визалык каттамдар күчүндө кезинде консулдук жыйымдардан бюджетке 5 миллион доллар түшүп турган.