«Манас» аэропортунда 15 доллардан аэропорттук жыйымдарды чогултуу боюнча коомдо талкуу жаралып, бул көрүнүштү бакиевдик заманда ар бир уюлдук чалуулардан 60 тыйындан алуу менен салыштыргандар чыккан.
Өкмөт башчы Темир Сариевдин басма сөз катчысы Бакыт Асанов: «Аэропорттук жыйымдарды 15 долларга жогорулатуу боюнча маалымат бурмаланып туура эмес түшүнүктөрдү пайда кылды. Бул жыйымдар мурдатан билеттердин баасында болгон, быйыл ойлонулуп чыгарылган жаӊычылдык эмес. Аэропорттук жыйымдарды ар бир уюлдук байланышка 60 тыйындан кошулгандыгына салыштыруу таптакыр болбойт. Жыйымдар калктын бардык катмарынан алынып жаткан жок. Чет жакка учкандардан гана алынат. Ал эми аэропорттук жыйымдардан түшкөн каражат Кыргызстандагы 5 эл аралык аэропортту каржылоого, алардын инфраструктурасын калыбына келтирүүгө жумшалганы жатат. Мындан сырткары Япониядан алынган насыяны жабууга керектелет»,- деп билдирди.
Президент Алмазбек Атамбаев да жыл сайын өткөрүлүүчү басма сөз жыйынында аэропорттук жыйымдардын 10 доллардан 15 долларга көтөрүлүшүнө каршы эместигин билдирди. Аталган жыйымдан алынган каражатка «Манас» аэропортуна бараткан жолдор оӊдолуп жатканын айтып, алар аркылуу Кыргызстанга туристтер, инвесторлор келерин белгиледи.

Мирлан Өмүралиев
politika@super.kg