• Кыргызстандан чет өлкөгө узак убакытка жылына 50 миӊден ашуун адам кетет.
• Токтогул ГЭСинде декабрь айында иштен чыккан 2 агрегаттын бири иштеп баштады. Экинчисинин оӊдоо иштерине 2 айдай убакыт кетери айтылган.
• Саламаттыкты сактоо министри Талантбек Батыралиевдин айтымында, өлкөдө 3 миӊ адам химиотерапияга муктаж жана ал дарылоонун бир курсу миӊ доллар турат.
• Бишкек мэриясы сыйымдуулугу 100-105 жүргүнчүдөн турган 50дөй жаӊы троллейбус сатып алат. Учурда борбордо 149 троллейбус каттайт.
• АКШнын сенаты Кыргызстанды коркунучтуу өлкөлөрдүн катарына киргизүү сунушун четке какты.
• Жаӊы түзүлгөн улуттук энергетикалык холдингге Айбек Калиев жетекчи болуп дайындалды. Ал буга чейин экономика министринин энергетика боюнча орун басары болуп иштеп келген.
• 2015-жылдын ичинде Бишкек шаарында катталган жол кырсыктарында 111 киши, анын ичинде 7 жаш бала көз жумган.
• Аскар Бешимов Кыргызстандын Түштүк Кореядагы ыйгарым укуктуу элчиси болуп дайындалды. Ал буга чейин Тышкы иштер министринин орун басарлык кызматында иштеп келген.
• Жогорку Кеӊештин Иш башкармалыгынын маалыматына ылайык, KG сериясындагы бардык 121 унаа номерлери алынып, андан ары жок кылуу үчүн тиешелүү бөлүмгө өткөрүлүп берилди.
• 2015-жылы жол эрежесин бузган айдоочулар 405 миллион сом айып пул төлөшкөн.
• Кыргызстанда 18 жаштан улуу адамдардын 6 миӊ 593ү жана 447 жаш бала ашыкча семирип кетүүдөн жабыркап келишет.
• Баткен облусундагы 19 айылда телефон байланышы жок.
• Кыргызстан Интерполго 160 миӊ евро карыз. Аталган уюмга мүчөлүк акы үчүн 15 миӊ евродон жылына төлөнүшү шарт. Кыргызстандын карызы 2002-жылдан бери чогулган.
• Ошто «9 жаштагы баланы зордуктаган» деп айыпталган медресенин мугалими психикалык жактан жабыркабагандыгы аныкталып, 15 жылга эркинен ажыратылды.
• «Ислам мамлекети» террордук тобунун лидерлеринин арасында кыргызстандык жарандар жок. Бул тууралуу УКМК билдирет.
• Кыргызстандын муфтияты жана башка компетенттүү органдар тарабынан жүргүзүлүп жаткан аттестациядан өткөн 2,5 миӊ имамдын 800ү гана өз кызматына туура келери белгилүү болду.

Мирлан Өмүралиев
politika@super.kg