Гезитибиздин өткөн санында бетке жасалчу макияждын туура жолдорун көрсөтүп бергенбиз. Бул жолу көздү боёону үйрөтөбүз.

МАКИЯЖГА ДАЯРДОО
Бетти жууп-тазалап, тоник менен сүрткөн соӊ кезек көзгө келет. Көздүн тегерегине арналган атайын крем сүйкөп, аны упа менен жабуу керек. Бул ыкма анын айланасындагы теринин тегиз көрүнүшү жана боёктун жакшы сүртүлүшү үчүн колдонулат.
Көз боёо үчүн сизге 3 түстөгү бири-бирине түспөлдөш тендер керек. Мисалы мындай:


КИСТЬ ТАНДОО
Сизде 3 түрдүү кисть болсо жетиштүү.
Эскертүү: Кисть сатып аларда синтетикадан жасалганын сатуучу канча мактаса да албаӊыз. Себеби андай кисть менен тенди сүйкөө ыӊгайсыз. Пони, тыйын чычкандын жүнүнөн жасалган кисттер менен боёо жеӊил.
Көздү боёордо кистти тенге тийгизип, бир жолу үйлөп салыӊыз. Мында тендин ашыкчалары түшүп, сүйкөп жатканда көзүӊүздүн астына түшпөйт.


НОРМАЛДУУ КӨЗДӨР ҮЧҮН
Тендин эӊ ачык түсүн алгач сурмаӊызга, кашыӊыздын астына сүйкөп, аны атайын кисть менен жакшылап жайылтуу керек.
Тендин кийинки күӊүрт түсүн көзүӊүздүн сырткы бурчуна сүйкөп, аны дагы сурманын ортосуна чейин жайылтып чыгасыз.
Артынан эӊ күӊүрт түстөгү тень менен көздүн сырткы бурчун боёйсуз.
Эскертүү: Боёп жатып биринчи түс менен кийинки түстүн куюлушуп кетишине көӊүл буруӊуз.


КӨЗДӨРҮҢҮЗДҮН ОРТОСУ АЛЫС БОЛСО
Тендин эӊ ачык түсүн кашыӊыздын астына сүйкөп, жакшылап жайылтыӊыз.
Ортоӊку түсүн сурмаӊызга сүйкөп, аны дагы атайын кисть менен жайылтуу зарыл.
Эми тендин эӊ күӊүрт түсүн көзүӊүздүн ички бурчуна сүйкөйсүз. Абайлаӊыз, өтө көп сүйкөп албаӊыз.
Кийин көзүӊүздүн бир бурчунан экинчи бурчуна чейин подводка чийип, туш коёсуз.


КӨЗДӨРҮҢҮЗДҮН ОРТОСУ ЖАКЫН ЖАЙГАШСА
Алгач көзүӊүздүн алдына, сурмасына, кашыӊызга чейин тендин эӊ ачык түсүн сүйкөп аласыз. Көздүн ички бурчуна ачык тень адаттагыдан көбүрөөк сүйкөлөт. Себеби бул көздүн ортосун алысыраак көрсөтүүгө жардам берет. Тендин күӊүрт түсүн көздүн сырткы бурчуна сүйкөп жайылтасыз. Көзүӊүздүн ортосу жакын болгондуктан подводканы көздүн чет жактарына эле чийиӊиз. Кийин туш коёсуз.

Нуркыз Курманбек кызы
kenesh@super.kg