Кыргызстандын Тышкы иштер министрлиги Орусиянын ТИМине 2 баланын органдарын сатуу аракети боюнча такталбаган маалымат үчүн нааразычылык нота жөнөттү. Орусиянын мамлекеттик телеканалында 4-январь күнү Кыргызстанда жашаган 6 жаштагы Тимофей Романенко жана 14 жаштагы Анна Черницынаны алардын апасы менен чогуу жашаган адам цыгандарга сатып жибергендиги айтылган. Телеканалдын маалыматы боюнча, цыгандар балдарды чет жакка алып чыгып, алардын органдарын сатышмак. Муну Орусиянын Кыргызстандагы элчилигинин вице-консулу Анастасия Антонова айтып берген. Бирок бул маалымат такталган жок. Ички иштер министрлигинин маалыматына таянсак, балдардын апасы ичкиликке жакын айым болгон. Ал өзүн-өзү асып өлтүргөн. Андан соӊ балдар апасынын таанышынын үйүнө кетип калышкан жана аларды Германиядагы туугандары алып кетүү аракеттерин көрүп жатышкан. Айрым маалыматтарга караганда, учурда Тимофей менен Анна Новосибирск облусунда жашап жатышат.

Мирлан Өмүралиев
politika@super.kg