Эки тараптуу сүйлөшүүлөрдөн кийин 26-март күнү өзбек тарап 18-мартта алып кирген аскер техникасын жана чек арачыларын Аксы районундагы такталбаган Чаласарт аймагынан чыгарып кетти. Муну менен чыңалып турган чек ара маселеси аз да болсо калыбына келе түштү.
Бирок Аксынын Кербен шаарына жакын жайгашкан Үңкүр-Тоо айланасындагы талаштуу маалыматка чекит коюлбай келе жатат. Белгилүү болгондой, 23-март күнү Кербен шаардык кеңештин депутаттарына өкмөттөн "Үңкүр-Тоодо жайгашкан станцияны башка орунга которуу үчүн ылайыктуу жер тапкыла" деген сунуш түшкөнү маалымдалган. Документте "Өзбекстандын аймагында жайгашкан "Кербен" станциясын башка жайга жылдыруу боюнча" деп даана жазылып турганы жалпы элге жарыяланып, өкмөт сындардын мөндүрүндө калган. Өкмөт бул токтом жасалма экенин айтып, «Өзбекстанга чектеш аймакта жайгашкан» деген жазуусу бар токтомду документтин түп нускасы деп көрсөтүүдө. Алдана берип көңүлү калган коомчулук өкмөттүн мындай актануусуна ишене албай турат.
30-мартта дал ушул Үңкүр-Тоонун айланасындагы маселелер боюнча Жогорку Кеңеш өкмөттүн маалыматын жабык эшик артында укту. Жалпы элдин кызыкчылыгындагы талылуу маселени бийликтегилер элден жашыруун талкуулашканы жоопсуз суроолорду көбөйттү. 29-март күнү эле аталган тоого байланыштуу маселени Жогорку Кеңештин тийиштүү комитети да жабык форматта караган эле. Комитет мүчөлөрү тоонун башынан байланыш толкундарын таратуучу станцияны ордунан жылдырбоо, тоо Өзбекстанга караштуу аймак деп көрсөтүлүп интернетке тараган документ боюнча иликтөө жүргүзүү чечимин кабыл алышкан. Ага ылайык, Башкы прокуратура 20-апрелге чейин талаштуу документ боюнча тийиштүү маалыматтарды комитетке берүүсү керек.