• Адамкул Жунусов Бажы кызматынын башчылыгынан бошотулду. Анын ордуна өкмөт башчы Сооронбай Жээнбеков АЗАМАТ СУЛАЙМАНОВДУ дайындады.
• Өлкөдө 13 миң ЧЕТ ӨЛКӨЛҮК СТУДЕНТТЕР билим алышат. Алардын эсебинен Кыргызстан 8 миллион доллардын тегерегинде киреше табат.
• «Чек арасыз репортёрлор» эл аралык уюмунун отчётуна ылайык, Кыргызстан СӨЗ ЭРКИНДИГИНИН индекси боюнча 180 өлкөнүн арасынан 85-орунду ээледи. Башкача айтканда, Кыргызстан КМШ өлкөлөрүнүн арасында жалпыга маалымдоо каражаттары эң эркин мамлекет деп табылды. Алсак, коңшу Казакстан 160, Өзбекстан 166-орунда.
• Быйыл мектептерде АКЫРКЫ КОҢГУРОО салтанаты 27-майга белгиленди. Бул тууралуу Билим берүү жана илим министрлиги маалымдады.
• 2015-жылы Кыргызстанга келген МАЛАЙЗИЯЛЫК ЖАРАНДАРДЫН саны 6 эсеге көбөйгөн. Маалым болгондой, 2014-жылы Кыргызстанга малайзиялык 62 жаран келсе, 2015-жылы алардын саны 368ге жеткен. Бул тууралуу Кыргызстандын Малайзиядагы элчилиги маалымдайт.
• Өлкөдө төрөтканаларда «БЭБИ-БОКС» же энеси жериген ымыркайларды таштап кетүү үчүн атайын контейнер орнотуу пландалууда. Бул аргасыздан келип чыккан чечим экенин саламаттыкты сактоо министри Талантбек Батыралиев билдирди.
• Транспорт жана коммуникация министринин орун басары УЛАН УЕЗБАЕВ кызматынан бошотулду. Уезбаев буга чейин Балыкчы-Корумду унаа жолун куруу боюнча тендердин айланасындагы ызы-чууга тиешеси бар экени айтылган.
• Билим берүү жана илим министрлигинин маалыматына ылайык, 4-класстын ОКУУЧУЛАРЫНЫН 80 пайызы окуп жаткан тексттин маанисин түшүнө албайт.
• Өлкөдө УЛУУ АТА МЕКЕНДИК СОГУШТУН 821 катышуучусу бар жана аларга 9-майда 10 миң сомдон жылына бир жолку берилчү акча тапшырылат.
• Беш күндүк график менен иштегендер үчүн 3-4-майдагы иш күндөрү 30-апрель жана 7-майга жылат. Ошентип, 2-5-май күндөрүнүн аралыгы ЭС АЛУУ деп жарыяланды.
• Президент Алмазбек Атамбаев Опера жана балет театрынын кызматкерлеринин айлык акысын жогорулатууну өкмөткө тапшырды.
• АЛМАЗБЕК КАДЫРКУЛОВ Мамлекеттик мүлктү башкаруу фондунун төрагасы кызматына дайындалды. Бул тууралуу өкмөттүн басма сөз кызматы билдирди.

Мирлан Өмүралиев
politika@super.kg