• Ысык-Көлдөгү 200 пансионаттын 60ынын гана КУТКАРУУЧУЛАРЫ бар. Бул боюнча Өзгөчө кырдаалдар министри Кубатбек Боронов маалымдады.
• Эмгек жана социалдык өнүктүрүү министринин орун басары Жылдыз Полотованын маалыматы боюнча, 2016-жылдын 1-кварталында Кыргызстанда 33 бала ар кандай ЗОРДУК-ЗОМБУЛУККА кабылган.
• Мамлекеттик чыккынчылыкка айыпталган Өкмөттүк аппараттын мурунку кызматкери АЛТЫНБЕК МУРАЛИЕВ 12 жылга эркинен ажыратылды. Ал мурдагы премьер-министр Амангелди Муралиевдин баласы.
• АБДИКАРИМ АЛИМБАЕВ Мамлекеттик чек ара кызматынын төрагасы кызматына дайындалды.
• Мамлекеттик ИПОТЕКАЛЫК компания бүгүнкү күнгө карата 21 жаранга 17 миллион сом суммасында жеңилдетилген насыя берген. Насыя алгандар 185 кардардын ичинен тандалып алынган.
• Өлкөдө акыркы 5 ай аралыгында катталган ЖАРАТЫЛЫШ КЫРСЫКТАРЫ 49 миллион сомдук чыгым алып келди.
• 15-майда Бишкекте II ДҮЙНӨЛҮК КӨЧМӨНДӨР оюндарына канча саат жана канча күн калганын санап көрсөтүп туруучу саат коюлду.
• Өлкөдө ден соолугунун мүмкүнчүлүгү чектелген 118 МИҢГЕ ЖАКЫН ЖАРАН бар. Башкача айтканда, алар калктын 2,9 пайызын түзөт.
• Кыргызстан 1500 БАЛА БАКЧАГА муктаж. Бул боюнча билим берүү жана илим министри Эльвира Сариева билдирди.
• 2017-жылдан тарта мектеп бүтүрүүчүлөрү КЫРГЫЗ ТИЛИ боюнча милдеттүү тест тапшырышат. Ал үчүн атайын тест иштелип чыкты.
• 2016-жылдын башталышынан бери Кыргызстанда 31 өспүрүм өз жанын кыйган. Бул боюнча парламентте депутат Чолпон Султанбекова билдирди.
• Кыргызстандык 518 жаран чет мамлекеттерде БАҢГИЗАТКА байланыштуу кылмыштардын айынан абакта отурат. Бул тууралуу Баңгизаттарды көзөмөлдөө боюнча мамлекеттик кызматтын башчысы Рафик Мамбеталиев билдирди.
• Мурунку транспорт жана коммуникация министри КАЛЫКБЕК СУЛТАНОВ 18-майда президенттин кеңешчиси болуп дайындалды.

Мирлан Өмүралиев
politika@super.kg